Reguit blik op glans
2012-02-19 21:33
- Artikelopsies
- Deel
- Kry Beeld op
Voorbladnooi – Van Pleinstraat tot Parys
Deur Nelle Dreyer
PROTEA, R185
Ek het nie vir Nelle Dreyer geken in haar gloriedae as een van ons land se eerste uitvoer- produkte nie – die elegante vrou met dáárdie wangbene en wilgerlatlyf, die eerste Suid-Afrikaanse model wat in internasionale glans-grotes soos Vogue en Harper’s Bazaar verskyn het voordat sy op 31 uitgetree het.
In Voorbladnooi vertel sy self haar lewensverhaal: van Plein- straat in Pretoria (die naam- keuse is doelbewus) tot Parys, Frankryk.
Die eerste deel – in die allerheerlikste geselstrant – gaan oor haar onkonvensionele grootworddae; avonture by ouma Plaas-hulle op Bulwater; haar obsessie met die supermodel Lauren Hutton.
Dalk was Nelle Dreyer van meet af aan vir groot dinge bestem; sy het graag met haar stylvolle ma by die Waldorf en Stuttafords gaan tee drink en gedroom van ’n glansryke lewe soos in die destydse Peter Stuyvesant-advertensies.
Haar openhartige verhouding met haar ma, wat toe al in homeopatie en rou kos geglo het, val op:
“Ma, as ’n seun en ’n meisie aan mekaar vat... Jy weet, sommer oral – is dit reg of is dit verkeerd? Is dit ’n sonde?”
“Dit hang van elke individu af, Nelletjie. As jy voel dit is reg, is dit reg, en wanneer dit verkeerd voel, is dit verkeerd.”
In die tweede deel vertel Dreyer op ’n amper skouerop- halende manier van ’n lewe van glansfotosessies, seks, dwelms en aborsie. Sy skroom nie om mond uit te spoel oor hoe kunsmatig die glanswêreld werklik is nie, hoe gewetenloos.
Dis nogal gerusstellend dat sy haarself nooit te ernstig as model opgeneem het nie.
Hier is nou vir jou ’n nooi wat beskik het oor die soort waag- moed en pit wat nodig was om in ’n klipharde modelwêreld kop bo water te kon hou. Voor- bladnooi bied insae in ’n wêreld wat vir die meeste van ons klink soos stof vir een van vandag se TV-werklikheidsreekse.
(Maar hoe is dit moontlik dat ’n fout soos “Studio 52” nie opgetel is nie? Almal weet tog dis die bekende New Yorkse nagklub Studio 54.)