Viljoen slaag waar vele ander misluk
2012-02-12 21:21
- Artikelopsies
- Deel
- Kry Beeld op
Grilbrigade
Fanie Viljoen
HUMAN & ROUSSEAU, R100
Om vandag ’n kinder- of jeugverhaalskrywer te wees beteken jy moet stelling inneem téén die moderne media en tegnologie.
Selfone, MXit en al die ander verskynsels bedreig en daag die kinderverhaalskrywer uit om iets te skep wat die jong leser sal boei.
Hoe kry ’n mens dit reg om te midde van soveel foefies die jong kind se verbeelding te stimuleer?
Wel, jy bou jou verhaal rondom hierdie verskynsels.
Carina Diedericks-Hugo het reeds in haar Thomas@-reeks gewys dit kan gedoen word en die leser word selfs verwys na die internet om ’n interaktiewe game (speletjie klink so
outyds) af te laai.
Fanie Viljoen begryp ook iets van hierdie kompleksiteit met sy verhaal Grilbrigade, pragtig uitgegee deur Human & Rousseau en met skitterende illustrasies deur Luan Serfontein.
’n Uitstekende kinderverhaalskrywer en ’n uitmuntende illustreerder kom hier bymekaar in ’n boek wat lekker lees.
Daar is ook QR-kodes vir besoeke op Facebook of ’n kuier op Fanie se webwerf.
Wil jy weet van die Grilbrigade? Beslis. Lees hierdie boek en koop dit vir jou jong kinders.
Net een beswaar: Sou ’n mens in moderne tye ’n jeugkarakter Buks noem? Ons het al ’n Jasper en Trompie gehad. Maar is die naam Buks cool? Ek dink nie so nie. Nietemin is dit ’n wonderlike avontuur saam met die Grilbrigade.
Ek lees graag Alice Miller se studies oor kinderpsigoanalise, soos The Drama of Being a Child, en daarom geniet ek kinder- en jeugboeke.
Die terugkeer na jeugboeke, beweer kenners, het dalk iets te make met die tyd toe jy nog gelukkig was, daardie oomblik voordat jy jou onskuld verloor het.
Carina Diedericks-Hugo het in ’n radio-onderhoud opgemerk dat die jeugboekskrywer sy/haar beste werk lewer juis deur terug te keer na daardie oomblik.
Die soort (jeug)boek waarvan jy hou, verraai dan ook iets van jou. Ek is gaande oor Saartjie Baumann en die Maasdorp-reeks.
Dr. Serfontein doen dit ook vir my. Dis hoekom ek nooit die volmaakte man kon vind nie.
Dit is vandag wonderlike tye vir die kind. Daar is soveel insigryke kinder- en jeugboeke. Ek gaan beslis nie my Grilbrigade weggee nie!