- Artikelopsies
- Deel
- Kry Beeld op
Ek het behoefte aan ’n klein Kersfees met ’n groot hart
deur Phia le Grange
2009-11-23 22:36
Ek het behoefte aan ’n klein Kersfees.
So kripperig.
So stallerig.
So aards dat jy amper hooikoors kan kry as die wind na jou kant toe draai. Die gestroopte dekor waar niks anders as ’n geboorte weer en weer gebeur nie.
Dit gaan nie eers oor ’n weersin aan die mors van geld nie of die blatante oordaad van Kersfeesvieringe nie. Dit is al tot vervelens toe en veelkantig bespreek en betreur.
Dit gaan oor ’n grondige bewussyn van die dieper Wese wat amper onbeduidend onder ons kom woon het. Ek wil nie weet hoe maagdelik die geboorte was nie, hoe wys die manne was nie; ek wil weet hóé naby en hóé duidelik die Godseun in my denke en my dade kan binnedring. Ek wil weet of ek afhanklik van God is, of ek kan treur, of ek sagmoedig genoeg is, of ek honger en dors na wat reg is, of ek barmhartig is, of ek rein van hart is, of ek kan vrede maak.
Of ek geseënd is.
Ek wil nie ’n alibi soek vir my onbetrokkenheid nie. Ek wil nie koes as God in my tuin saam met my wil loop nie. Ek wil nie my godsdiens metafories leef nie.
As ek dít verstaan, sal ek lig kan lewe. Dan sal ek weet hoe om die jong meisies wat so lag vir hul oorgewig vriendin te troos. Jy kan tog sekerlik net stukkend maak as jy skerwe in jou eie lyf het.
Waar kom die skerp kante anders vandaan? Dan sal ek weet hoe om die lywige vriendin te laat glo dat sy ook geboorte kan gee. Dat sy ook die oorsprong van lewe kan wees. Al begin sy in ’n stal. In ’n krip. Meer nog sal ek haar leer dat sy weer gebore kan word. Oor begin.
En die samoerai-seuns, wat so sterk en mooi in die somerson saamstaan in hul disrespek vir waardestelsels, wat so maklik lyke langs die pad laat lê, so tussenmenslik ongevoelig en hedonisties leef. Hoe sal ek hul knieë kan laat buig voor ’n suigeling? Hoe kan ek hulle laat honger en dors na wat reg is?
Ek sal terugkeer na die begin. By die besef hoe afhanklik ek van God is, hoe afhanklik ek van ’n stalgeboorte is. Hoe nodig ek meelopers het wat saamsing oor die nuwe kind.
Ek het behoefte aan ’n klein Kersfees met ’n groot hart.