'Ek sal tsotsi's jou laat vermoor'

Virginia Keppler

“Ek sal die tsotsi’s stuur om jou te kom doodmaak.”

So het ’n veiligheidswag by die Midstream-landgoed in Midrand glo ’n inwoner toegesnou toe dié hom gekonfronteer het oor die wag se “onbehoorlike gedrag” teenoor sy dogter.

Mnr. Fanie Kok het gister gesê hy beskou die woorde van die wag as ’n doodsdreigement en het dit by die Olifantsfontein-polisiekantoor gaan aanmeld.

Die voorval het op 28 Desember plaasgevind nadat Kok se dogter, me. Liza Kok, en ’n vriendin by die landgoed wou uitry om brandstof in die vriendin se motor te gaan gooi.

“Toe hulle by die Old Kent-hek kom, wou Liza (wat toe op die passasiersitplek gesit het) die wag nader wink sodat sy haar vingerafdruk op die masjien kon plaas om die hek oop te maak.

“Die wag het egter geweier om na haar te stap en het gesê sy moet na hom loop.

“Toe sy by die huis kom en my vertel wat gebeur het, het ek na die hek gegaan om die wag oor sy onbehoorlike gedrag te konfronteer. Sover dit my aangaan, moet die wagte by dié landgoed ten alle tye na voertuie loop om inwoners en besoekers te help.

“Ek het dit duidelik so aan die wag gestel en het gesê ek gaan die saak by sy hoofde aanmeld.”
Hy het gesê dit is toe dat die wag hom met die dood gedreig het.

“Ek beskou dié doodsdreigement in ’n baie ernstige lig en het rede om te glo dat hy dit sal uitvoer,” het Kok gesê.

Hy het ’n e-pos aangaande die voorval aan mnr. Suiker Britz, landgoedbestuurder, gestuur.
Britz het gister gesê die aangeleentheid word ondersoek.

Kapt. Lesibane Molokomme, polisiewoordvoerder, het bevestig dat Kok die voorval by die polisie aangemeld het.