Eerlikheid van nuwe vervolger betwyfel

Pieter du Toit

Kaapstad. – Die nuwe nasionale direkteur van openbare vervolging (NDOV), adv. Menzi Simelane, se integriteit was al die onderwerp van ’n regeringsondersoek.

Pres. Jacob Zuma het gister aangekondig Simelane is die nuwe NDOV – enkele dae nadat die staat en Simelane se voorganger, adv. Vusi Pikoli, ’n skikkingsooreenkoms bereik het. Pikoli het daarvolgens ’n hof-aansoek teruggetrek waarmee hy sy afdanking sou beveg.

Simelane is daarvoor bekend dat hy hom vir ’n sterker rol vir die uitvoerende gesag in die nasionale vervolgingsgesag (NVG) beywer en vir sy mening dat die NDOV aan die minister van justisie moet verslag doen.

Hy het tot onlangs as direkteur-generaal (DG) van justisie gedien en is verlede maand as een van vier adjunkdirekteurs van die NVG aangestel.

Die presidensie het in ’n verklaring gesê Simelane is aangestel ondanks ’n ondersoek wat die Staatsdienskommissie (SDK) in opdrag van die destydse pres. Kgalema Motlanthe gedoen het.

Dít het gevolg op Simelane se getuienis tydens die kommissie van ondersoek na Pikoli se geskiktheid vir die amp van NDOV.

Dr. Frene Ginwala, die kommissie se voorsitter, was toe skreiend in haar bevindings en het gesê Simelane se gedrag en getuienis “het veel te wens oorgelaat”.

Sy het onder meer gesê dit is “teenstrydig”, “onakkuraat en sonder enige gronde in feite of die wet”, “vals”, “sonder enige substansie”, “ver van die waarheid verwyder” en bes moontlik deur ’n persoonlike vete gemotiveer. Sy het bevind Simelane het nie begryp wat sy rol as DG in verhouding tot die NDOV en NVG was nie.

Motlanthe het die SDK in Desember verlede jaar gevra om ’n ondersoek na Simelane te doen “omdat sy eerlikheid in twyfel getrek word”.

Dié ondersoek is voltooi en mnr. Jeff Radebe, minister van justisie, het besluit om geen verdere stappe teen Simelane te doen nie. Hoewel daar reeds berig is die SDK het aanbeveel Simelane moet aan ’n tugprosedure onderwerp word, is die verslag ondanks beloftes deur Radebe nog nie bekend gemaak nie.

Simelane was ook die skrywer van die omstrede brief waarin Pikoli beveel word om sy beplande vervolging van mnr. Jackie Selebi, destydse polisiehoof, te staak.

- Beeld