Hof weier Jurie Els se ontslag
2009-11-25 02:36
- Artikelopsies
- Deel
- Kry Beeld op
Jeanne-Marié Versluis
Jurie Els kan vanoggend moontlik sy kant van die saak in die hooggeregshof in Pretoria stel nadat sy aansoek om ontslag gister geweier is.
Waarnemende regter Chris Eksteen het gesê hy glo dit kom as ’n verrassing of ’n skok vir die verdediging, maar onder meer in ag genome die getuienis wat deur die staat aangebied is, moet die hof ontslag weier. Hy het gesê hy maak dié bevinding “sonder meer”.
Hy is nie verplig om in dié stadium redes vir sy bevinding te gee nie, het die regter gesê. Hy het die verhoor tot vandag uitgestel om Els kans te gee om sy regsposisie te oorweeg.
Die vriendelike Els het oudergewoonte geglimlag toe die hof daarna verdaag het.
Els word daarvan beskuldig dat hy die sanger Robbie Klay (23) onsedelik aangerand het toe dié tussen 11 en 16 jaar oud was.
Adv. Corli Bouwer, staatsaanklaer, het gister toegegee die staat kon nie die eerste aanklag van onsedelike aanranding bewys nie.
In dié aanklag is beweer Els het Klay gemolesteer toe hy jonger as 12 was.
Adv. Danie Dorfling, namens Els, het gesê die verhoor het ’n “klomp publisiteit” meegebring en tot gevolg gehad dat “mense meegesleur en meegevoer” is.
Volgens Dorfling kan die hof hom nie langs dié stroom laat meesleur nie.
Eksteen het daarop gevra: “Het u rede om te vermoed dat die hof hom laat lei deur koerantberigte en Huisgenoot?”
Dorfling het gesê “daar word sekere verwagtinge en persepsies in die openbare oog geskep” en die regter het ’n grondwetlike plig om Els ’n billike verhoor te gee.
As daar nie redelike vooruitsigte is dat Els moontlik skuldig bevind kan word nie, moet die hofverrigtinge nou reeds deur ontslag gestop word.
Bouwer het betoog die staat volstaan met die tweede aanklag van onsedelike aanranding (dat Klay glo tussen die ouderdom van 12 en 16 jaar gemolesteer is) en die derde aanklag – een van die uitlokking van Klay om seksdade te pleeg toe hy nog nie 16 was nie.
Die verdediging het aangevoer daar kan moontlike motiewe wees hoekom Klay vals aanklagte teen Els sou indien, soos dat Huisgenoot hom R10000 betaal het vir ’n onderhoud oor die bewerings teen Els; dat Klay wou hê “ietsie” moes op romantiese vlak tussen sy ma, me. Jenny Liebenberg, en Els gebeur; en dat Klay weens moontlike afguns op Els daartoe gedryf is.
Die verdediging het ook aangevoer die feit dat Els getrou het (met Hestrie Cloete) en ’n ander persoon dus die ruimte in Els se lewe gevul het, is nog ’n faktor wat Klay “goed moontlik” sou kon motiveer om Els valslik te inkrimineer.
- Beeld