Skoolhoof laat hond glo weggooi
2010-02-09 00:56
Virginia Keppler
Die Brits-polisiekantoor ondersoek ’n klag van dieremishandeling nadat ’n skoolhoof agt skoolseuns glo beveel het om ’n uitgeteerde boerboel wat in ’n klaskamer gaan skuil het in ’n bos te gaan weggooi.
Die Tshwane-Dierebeskermingsvereniging (DBV) het die hond later van kant gemaak om hom uit sy lyding te verlos.
Die hond het glo skuiling in ’n klaskamer by die Kutlwano Primary School in Brits gaan soek.
Mnr. Mishack Matlou, ’n inspekteur by die DBV, was gister aan diens in Ga-Rankuwa, noordwes van Pretoria, toe ’n onderwyser van die skool hom gebel en van die “siek hond” vertel het.
Toe hy daar kom, het ’n onderwyser hom meegedeel dat die hoof die skoolseuns beveel het om die hond van die skoolterrein te verwyder. Die seuns het die hond na ’n veld naby die skool gedra, het Matlou in ’n verklaring gesê.
Matlou is saam met die seuns na die veld waar hulle na die hond gesoek het, maar hulle kon hom nie opspoor nie.
Die seuns is later terug skool toe. Matlou het teruggekeer na die veld waar hy weer na die hond gesoek het totdat hy hom opgespoor het.
Hy het met die dier na die DBV in Pretoria gejaag. ’n Veearts het bevind die hond is erg uitgeteer, vuil en oortrek van vullis en vlooie.
Die hond was erg uitgeteer, het ’n wond agter een van sy bene gehad en kon nie behoorlik staan nie.
Dr. Riana Rosslee, die veearts, het gesê die hond moes van kant gemaak word om sy lyding te beëindig.
“Leerlinge moet geleer word hoe om diere met vriendelikheid te behandel. Die verdagte moes ’n voorbeeld vir die leerlinge gestel het,” het Matlou gesê.
Mnr. Rick Allan, besturende direkteur van die Tshwane-DBV, het gesê hulle sal die saak tot in die hof volg. Dié soort dieremishandeling kan nie geduld word nie, het hy gesê.
’n Polisiewoordvoerder het gesê niemand is nog in verband met die voorval gearresteer nie.
- Beeld