Blonde meisie brand by pad

Sonja van Buul

Die lyk van ’n “netjiese, goedversorgde” jong meisie met lang, blonde hare is oop en bloot langs ’n teerpad aan die Vaal-Rand aan die brand gesteek.

’n Gru-toneel het ’n verbyganger begroet toe hy eergisteroggend op die brandende jong vrou langs die Welgevonden-pad afgekom het.

Sy was vermoedelik tussen 16 en 20 jaar oud.

Die man het die polisie gebel, die brand geblus en by die lyk gewag totdat die polisie omstreeks 04:30 op die toneel tussen Orange Farm en Poortjie aangekom het.

Die meisie het ongeveer ’n meter van die teerpad op haar rug in die langerige gras tussen vullis gelê.

Remmerke van ’n voertuig was duidelik op die teer sigbaar langs die plek waar sy gevind is. Niks is gedoen om die lyk weg te steek nie.

“Rook het vroegoggend in die omgewing gehang en die verbyganger het gaan kyk wat brand, toe kom hy op die brandende lyk af,” het kapt. Johannes Motsiri, polisiewoordvoerder, gister gesê.

“Iets is oor die meisie se gesig gegooi en sy is aan die brand gesteek nadat ’n onbekende vloeistof ook oor haar lyf uitgegooi is. Veral haar gesig is onherkenbaar verbrand.”

Volgens Motsiri het die meisie geen identifikasie aan haar gehad nie.

“Dis moeilik om haar ouderdom te skat, want sy is erg verbrand, maar sy is jonk,” het Motsiri gesê.

Een van haar hande is nie verbrand nie. Haar vinger- en toonnaels het rooi naellak op en daar is pienk sonstrepies in haar hare.

“Sy het ’n bra, broekie en ’n T-hemp aangehad,” het Motsiri gesê.

Dit is glo ’n veelkleurige T-hemp met dwarslopende strepe.

Volgens Motsiri ondersoek die polisie die moontlikheid dat die meisie eers elders vermoor, later langs die grondpad neergegooi en toe aan die brand gesteek is.

Beeld het uit ’n betroubare bron verneem dit het tydens die lykskouing aan die lig gekom die meisie het dalk nog geleef toe sy aan die brand gesteek is.

Dit is nie bekend of sy seksueel aangerand is nie.

“Sy lyk soos ’n netjiese, goedversorgde kind en ek kan nie glo dat niemand na haar soek nie,” het iemand na aan die moordondersoek gesê.

“Ons het dadelik met die moord­ondersoek begin en soek die slagoffer se naasbestaandes,” het Motsiri gesê.

Die polisie vra enigiemand met inligting oor die moord of die meisie se identiteit om insp. Chris Olifant, ondersoekbeampte, by 083 692 7786 te bel.