'Versteurde' seun vermoor oupa glo

Fanie van Rooyen

’n 15-jarige “versteurde” seun van Pretoria-Tuine het gistermiddag na bewering sy oupa (65) met ’n broodmes doodgesteek.

Die polisie en familie van die beweerde aanvaller en slagoffer het gisteraand verskillende weergawes gehad oor die moord en het dit onderskeidelik as ’n ongeluk en ’n struwe- ling beskryf.

Insp. Louis de Bruin, polisiewoordvoerder, het gisteraand gesê die seun het omstreeks 15:00 ’n woordewisseling met sy oupa in sy oupa se kamer gehad. “Die seun het ’n mes uit die kombuis gaan haal en toe na sy oupa se kamer teruggekeer en hom in die bors gesteek. Ons weet nog nie wat was die motief nie. Dit is nog ’n deurmekaarspul.”

Ná die voorval het die seun volgens De Bruin van die toneel gevlug. Hy is omstreeks 17:30 deur die polisie in ’n straat in dié buurt langs die pad aangekeer.

De Bruin het gesê ’n saak van moord is teen die kind aanhangig gemaak. Die verdagte word in ’n plek van veiligheid aangehou en sal na verwagting môre in die Pretoriase landdroshof verskyn.

Nie die aanvaller of sy oupa se naam mag bekend gemaak word nie aangesien minderjarige verdagtes wetlik nie geïdentifiseer mag word nie.

De Bruin het gister beweer dat die seun ’n “probleemkind” is wat al in die Weskoppies- (sielkundige) hospitaal opgeneem is en vermoedelik tans op medikasie is.

’n Oom van die verdagte en ook seun van die slagoffer wat ten tyde van die voorval in die huis was, het egter die seun gister as “verstandelik gestrem” beskryf en gesê die voorval was ’n ongeluk.

“Die seun en sy oupa het in die kamer gespeel en toe was daar ’n ongeluk,” het die oom gesê.

Die slagoffer is nie op slag dood nie, maar het op die toneel beswyk.