Laggende gewapendes wil vroue van pad druk
2010-01-21 08:23
- Artikelopsies
- Deel
- Kry Beeld op
Virginia Keppler
Drie gewapende mans het eergistermiddag om 15:00 op die Boschkop-pad, oos van Pretoria, twee vroue en ’n maand oue baba van die pad probeer afdruk terwyl hulle ’n rewolwer op die vroue gerig het.
Die mans het die heeltyd vir die vroue gelag.
Mev. Anita Fourie (56), haar dogter, Ankea Pretorius (33), en dié se baba, Ruben (1 maand), was op pad na hul plaas in Boschkop toe die voorval gebeur het.
“My dogter het bestuur en ek het agter saam met die baba gesit. Die volgende oomblik het ’n wit BMW op ons afgepyl en byna agter in ons vasgery,” het Fourie gesê.
“Ek het aanhoudend vir die bestuurder van die BMW gewys om verby ons te ry, want daar was geen ander voertuie op die pad nie, maar hy het hom nie aan my gesteur nie,” het Fourie gesê.
Volgens haar het die BMW toe langs hulle begin ry. “Die passasier wat links voor gesit het, het sy venster afgerol en ’n rewolwer teen my dogter se venster gedruk.”
Fourie het gesê Pretorius het in daardie stadium aanhoudend geskreeu: “Ma, hy gaan my skiet!”
“Ons het seker vier minute lank so gery en die heeltyd het hulle vir ons gelag. Ek het die baba vasgehou en met my liggaam probeer beskerm,” het Fourie huilend vertel.
Pretorius het in ’n stadium die BMW langs die kant hard gestamp om die mans van hulle af weg te kry, maar dit het nie gehelp nie.
’n Vragmotor wat in die teenoorgestelde rigting aangery gekom het, het waarskynlik die vroue se lewe gered, want die BMW het spoed verminder, omgedraai en weggejaag.
Fourie het gesê haar dogter is erg getraumatiseer.
Tuis het die vroue byna twee uur lank gesukkel om die Boschkop-polisie in die hande te kry. “Toe ek uiteindelik ’n polisieman in die hande kry, het hy
gesê hy gaan nie nou uitkom nie, want niemand is dood of beseer nie. Ons buurtwag het ons kom ondersteun.”
Insp. Marinda Stoltz, polisiewoordvoerder, het Fourie gister persoonlik gebel en verskoning gevra en gesê die voorval sal ondersoek word.
Hulle gaan ook vasstel wie die betrokke polisieman is. “As dit daarop neerkom dat hy versuim het om sy plig na te kom, gaan hy departementeel vervolg word,” het Stoltz gesê.