Doodgeskiet toe rowers foon langs bed wil vat

Linda de Beer

’n Jong inligtingstegnoloog van Krugersdorp is Vrydag tromp-op in die maag geskiet toe hy vermoedelik wakker geword het terwyl gewapende rowers sy selfoon langs sy bed gesteel het.

Mnr. Charl Smuts (25) is sowat ’n uur later by sy aankoms by die Brits Medi-Clinic dood verklaar.

Die skietvoorval het op ’n kleinhoewe buite Brits gebeur waar Smuts en me. Lizanne Nienaber, sy meisie, by vriende gekuier het wat Vrydag trou.

Insp. Wilmarie van der Merwe, provinsiale polisiewoordvoerder, het gesê die voordeur van die hoewehuis is omstreeks 01:40 deur minstens drie gewapende rowers oopgebreek.

Smuts het vermoedelik wakker geword en opgespring toe die rowers langs sy bed was om sy selfoon en beursie te vat. Mev. Laetitia Smuts, sy ma, het gesê hy was ’n ligte slaper.

Hy is in die maag geskiet, waarna die rowers gevlug het.

Mev. Smuts het gesê ’n lykskouing sal gehou word om die oorsaak van haar seun se dood te bepaal.

“Charl se vriende het hom geken as die gentle giant. Hy het altyd tyd gehad vir almal. Hy het nooit onderskeid getref tussen wit, swart, pienk of pers nie. As jy sy vriend was, was dit lewenslank,” het mev. Smuts gesê.

Nienaber kuier uit Londen – waar sy vir twee jaar werk – in Suid-Afrika. Sy en Smuts het by ’n vriendin gekuier toe hy doodgeskiet is.

Smuts laat ook sy pa, George, en suster, Nicolene (23), agter.

Hy het in sy ouerhuis in Krugersdorp gebly en in Lonehill gewerk.

Sy begrafnisdiens is voorlopig gereël vir Vrydag 11:00 uit die NG kerk Rant-en-Dal in Krugersdorp.

Niemand is nog weens die moord in hegtenis geneem nie.

- Beeld