Krokodil wat Dusi bedreig, hap man byna
2009-11-18 22:43
Dries Liebenberg
Durban. – Die krokodil wat die Dusi-kanomarathon se organiseerders hoofbrekens gee, is weer gewaar en dié keer het hy byna ’n Durbanse man in sy kake gehad.
Mnr. Nivash Dhookran (37) van Reservoir Hills wat die afgelope 30 jaar op die oewer van die Umgenirivier woon, het twee weke gelede afgebuk om kruie te pluk toe die krokodil skielik sy bek langs hom oopmaak.
“Teen die tyd dat die krokodil se kake toegeklap het, het Nivash al weggehardloop,” het mnr. Ray de Vries, woordvoerder van die kanowedvaart, gister gesê nadat die organiseerders van die voorval te hore gekom het.
Organiseerders van die Dusi (die wêreld se grootste kanowedvaart) is al van verlede maand bekommerd oor krokodille wat op die roete opgemerk is.
In Oktober is drie tot vier krokodille by ’n keerwal hoër op in die rivier gesien. Maar teen begin vandeesmaand is ’n 2 m lange krokodil sowat 800 m van die wedvaart se eindpunt by Blue Lagoon opgemerk.
De Vries reken dis dieselfde een wat nou na Dhookran gehap het.
Volgens Dhookran het mense van die omgewing onlangs opgemerk die kolganse raak al hoe minder – daar is nou net twee oor en hulle bly “vér van die rivier af weg” - en die karp het “te kere gegaan asof dit die sardienstormloop is”, het De Vries gesê.
Een van Dhookran se werkers het op 2 November die krokodil die eerste keer op die oewer gewaar. Die volgende dag is Dhookran op sy plaas aangeval.
“Ek het my byna doodgeskrik,” het hy gesê. Iemand het ná die voorval die krokodil met ’n selfoon afgeneem.
Die Dusi se organiseerders het die afgelope twee weke al ’n helikopter gehuur om na die krokodille te soek.
Hoewel hulle nie die krokodille kon opspoor nie, het baie gemeenskappe langs die rivier gesê hulle het die gedierte al gesien.
“Op een plek het die inwoners hul kinders verbied om in die rivier vis te vang,” het De Vries gesê.