‘Almal weet wie kwaad stook’

Pieter du Toit

Kaapstad. – Mnr. Julius Malema, omstrede ANC-jeugleier, is gister indirek deur die SAKP uitgewys as die bron van twis in die regerende alliansie.

“Ons weet die meerderheid van ANC-kamerade, lede van die jeugliga, ondersteuners van die regerende alliansie en Suid-Afrikaners in die algemeen weet presies wat die bron is van aanhoudende moddergooiery, karaktermoord, faksieverdeling en eng chauvinisme.”

Die party het Malema in ’n verklaring nie pertinent by die naam genoem nie, maar gesê dit is jammer “sommiges” verkies om op die “oorlogstromme” te hamer eerder as om verskoning te vra en introspeksie te doen.

Dit volg op ’n onstuimige tyd in die alliansie waartydens Malema se uitlatings politieke temperature die hoogte laat inskiet het. Hy het die SAKP boonop vandeesweek verder uitgedaag en gesê hy is gereed vir oorlog, sou dit verklaar word.

Die SAKP het gister teruggekap en gesê almal weet wie die bron van twis is.

Die SAKP gaan nie tot Malema se vlak daal nie en is tevrede dat hy genoegsame steun binne die alliansie geniet, lui die verklaring.

Mnr. Jeremy Cronin, die SAKP se adjunk-hoofsekretaris, en mnr. Zwelinzima Vavi, Cosatu se sekretaris-generaal, het gister bevestig hulle het ’n vergadering vir vroeg in die nuwe jaar met die ANC belê om die lug in die regerende alliansie te suiwer.

Hoewel albei organisasies volhou die alliansie beleef nie ’n krisis nie, het Vavi tydens dié vakverbond se laaste mediakonferensie vir die jaar by sy hoofkantoor in Johannesburg gesê die verskille tussen vennote is betreurenswaardig. Dit is egter die gevolg van persoonlikhede wat bots.

“Dit maak nie saak hoe kwaad kamerade word nie, daar moet grense wees,” het Cosatu in ’n verklaring gesê.

- Beeld