Volg dié NG sinode se vergadering op YouTube, blogs en Twitter
2009-10-11 21:20
- Artikelopsies
- Deel
- Kry Beeld op
Neels Jackson
Die NG Kerk se oostelike sinode gaan sy vergadering oopstel vir bydraes deur alle belangstellendes.
Dié eksperimentele stap is ’n poging om deursigtigheid te bevorder en nog ’n vlak van deelname te bewerkstellig op die vergadering wat van Sondagaand tot Dinsdagmiddag duur.
Dr. Ferdie Clasen, ondervoorsitter van die sinode, sê hulle gaan Twitter, blogs en SMS’e gebruik om dit te doen. Omdat dit nog ’n eksperiment is, word dit ook net tydens sekere sessies van die vergadering gedoen.
Ds. Cobus van Wyngaard wat die saak reël, sê daar gaan ’n bloggerstafel wees waar vier mense hul indrukke van die vergadering gaan neerskryf.
Belangstellendes sal dit op die internet kan volg via skakels by http://sinoos.wordpress.com .
Van binne en buite die vergadering kan mense boodskappe via www.twitter.com of per selfoon stuur.
Dit sal in die vergadering op ’n skerm vertoon word, maar mense buite die vergadering sal dit ook op Twitter kon volg. Die sleutelwoord (of hashtag) is #sinoos.
Kort video-opnames van dele van die vergadering sal ook op www.youtube.com geplaas word.
Omdat dit vir baie mense ’n nuwe ding is, sê Van Wyngaard dat hy nie dink dit dadelik ’n groot sukses sal wees nie.
Clasen sê dis ’n “totale eksperiment” met die oog op die toekoms.