Mediese afval agter spreekkamer verbrand
2009-11-16 22:37
- Artikelopsies
- Deel
- Kry Beeld op
Buks Viljoen
“Ek is net ’n junior dokter. Ek weet nie wat om met die goed te doen nie.”
Dit was gister die verskoning van dr. Chantal Reddiar omdat sy mediese afval, waaronder gebruikte spuite en naalde, agter haar spreekkamer in die Nelspruit-middestad verbrand.
By Beeld se besoek aan die spreekkamer is ’n boks met bykans 100 spuite steeds met hul naalde aan in die verbrande hoop afval gekry.
Mnr. Johan Meyer, bestuurder van ’n ysterwarewinkel in dieselfde kompleks waar Reddiar se spreekkamer is, sê hy het Saterdag op die grillerige affêre afgekom.
“Ek het aanvanklik gedink hulle het vleis gebraai. Ek was nogal knorrig omdat hulle van ons bakstene gebruik het om ’n vierkantige brandstapel te maak.
“Toe kap hulle nog van ons houtpalette stukkend, maak ’n vuur daarmee en gooi die mediese afval daarin.”
Mnr. Pierre van Brakel, assistentbestuurder van gesondheid van die Ehlanzeni-distriksmunisipaliteit, was gister saam met Beeld op die toneel.
Reddiar sê die praktyk behoort glo aan haar pa, dr. D.S. Reddiar, maar hy is tans met siekteverlof.
Sy sê sy het nie geweet wat om met die afval te doen nie en het toe opdrag aan ’n werker gegee om dit te verbrand. “Ek het die provinsiale hospitaal gebel om die afval te kom haal, maar hulle het geweier.”
Van die bakstene wat gebruik is om die brandstapel te maak, kon nie van die plaveisel gelig word nie omdat dit weens die gesmelte plastiek vasgesmelt het.
Van Brakel het ook die spreekkamer geïnspekteer. “Hulle het glad nie ’n spuitnaald vernietig nie en gooi dit eenvoudig in ’n asblik.”
Van Brakel sê ingevolge wetgewing moet spuitnaalde reeds in die spreekkamer vernietig word voordat dit weggegooi word.
Hy sê alle mediese afval moet direk van ’n spreekkamer na ’n verbrandingsaanleg geneem word.
Kontrakteurs wat spesialiseer in die vernietiging van mediese afval mag ook aangestel word om die afval te vernietig.
“Dit mag nooit deur die normale vullisverwyderingsprosedures van stadsrade hanteer word nie.”
Van Brakel het hulle ’n mondelinge waarskuwing gegee.
Hy sê egter gesondheidsinspekteurs sal die spreekkamer vandag weer besoek.