2 oudste vroue vier saam hul verjaardag
2009-11-16 22:37
Sandra Coetzee
Bloemfontein. – Twee van die oudste vroue ter wêreld bly ’n paar straatblokke van mekaar in Bloemfontein én verjaar op dieselfde dag – maar ken mekaar nie.
Op 11 November het mev. Christina Khamale 112 jaar en mev. Puleng Maleleka 108 jaar oud geword.
Khamale, wat in die Batho-gebied bly, is gister deur die Batho-polisiekantoor getrakteer met ’n verjaardagpartytjie en geskenke wat gewissel het van komberse, eetgoed en ’n Bybel tot kruideniersware.
Sr.supt. Agnes Nxamagele, stasiekommissaris van die Batho-polisiekantoor, het gesê dit is inderdaad vir die polisie ’n groot eer om ’n mens in hul gebied te hê wat dié uitsonderlike ouderdom bereik het.
“Dit is nie maklik om so ’n ouderdom te bereik nie. ’n Mens kan ook sien sy word goed versorg deur haar familie en dit is goed so,” het Nxamagele gesê.
Albei vroue word deur hul dogters versorg.
Maleleka het juis in haar dogter se huis in Bochabelo ’n uiltjie geknip toe Beeld se susterkoerant Volksblad daar opdaag.
Sy is effens sterker as Khamale, maar haar voete gee probleme en sy sukkel om daarop te trap. Albei die vroue het streng Christelike waardes.
Terwyl Khamale die jonges van vandag maan om respek vir hul meerdere en oueres te hê, skroom Maleleka nie om die jonges te berispe as hulle nie kerk toe gaan nie.
“Sy sing kerkliedere en glo ’n meisie moenie ’n langbroek dra nie, maar ’n rok. Dit is van die langbroekdraery dat dinge vandag skeefloop,” het haar dogter, mev. Anacletae Letsapo, gesê.
Maleleka sê sy het nooit gedink sy sal so oud word nie. Sy onthou nog goed die goeie ou dae toe sy heeldag gewerk het.
Sy beduie hoe sy mieliemeel gemaak en pap buite die huis in ’n pot gekook het.
Sy geniet nie meer die moderne tyd waarin sy lewe nie.
Dinge het moeilik geword. Mense loop verkeerd en baie mense is ongelukkig, sê sy.