Diereregtegroep vra interdik teen Zoeloe-koning
2009-11-23 00:46
- Artikelopsies
- Deel
- Kry Beeld op
Dries Liebenberg
Durban. – ’n Diereregte-organisasie het ’n aansoek om ’n interdik teen onder andere koning Goodwill Zwelithini ingedien om te keer dat jong mans tydens die jaarlikse oesfees ’n bul met hul kaal hande doodmaak.
Die aansoek is Vrydag by die hooggeregshof in Pietermaritzburg ingedien nadat Animal Rights Africa (ARA) van 16 Oktober al probeer het om met die Zoeloe-koningshuis en regeringsdepartemente daaroor in gesprek te tree.
Die organisasie People for the Ethical Treatment of Animals (Peta), een van die talle wat die ARA in die aansoek steun, het aan pres. Jacob Zuma geskryf oor dié praktyk tydens die Umkhosi wokweshwama, wat begin Desember gehou word.
“Die eerste reaksie wat ons ontvang het, was Vrydag van die premier se kantoor nadat die hofstukke bedien is,” het me. Tina Costas, die ARA se prokureur, gister gesê.
Die ARA wil keer dat ’n bul op die fees doodgemaak, beseer of mishandel word en steun onder meer op die Dierebeskermingswet.
Die slagordes word egter ook opgestel vir ’n konstitusionele stryd tydens die hofaansoek Dinsdag.
Volgens Costas beroep die ARA hom op ’n persoon se konstitusionele reg op ’n bewussyn en oortuigings, waardigheid en ’n omgewing wat nie skadelik vir iemand se welsyn en gesondheid is nie.
Einde verlede week het mnr. Nhlanhla Mtaka, ’n konsultant wat by die fees betrokke is, in ’n artikel in The Mercury geskryf dis “?’n klassieke geval van selfaangestelde kulturele chauviniste wat aan die meerderheid mense probeer voorskryf hoe hulle hul kultuur moet beoefen”.
Die ARA voer aan ’n groep van sowat 40 jong mans maak jaarliks tydens die fees ’n bul in die teenwoordigheid van die koning dood. Die bul se oë, tong en geslagsdele word na bewering uitgeruk terwyl hy steeds leef. Sand word ook in die dier se keel afgedruk om hom te laat versmoor terwyl die bul geslaan en geskop word.
Die ARA verwys na ’n webwerf oor die koningshuis waarvolgens geglo word dat die krag van die bul aan die koning oorgedra word sodat hy die Zoeloevolk kan beskerm.
Volgens die ARA beteken die beskerming van kulturele regte in die Grondwet nie dat die koning van ander landswette vrygestel word nie.
Mnr. Ndabe Sibiya, woordvoerder van die premier se kantoor, het gesê die provinsiale regering se uitvoerende raad het gehoop dat alle betrokkenes die kwessie sou kon bespreek sodat ’n besluit tot voordeel van die hele nasie bereik kon word.
- Beeld