‘Nee! Nee! Nee!’ – toe 2 skote

Virginia Keppler

Pretoria - Die bewoner van ’n kleinhoewe in Magalies-Moot, in die weste van Pretoria, is eergisteraand in sy sitkamer deur twee gewapende rowers oorval en geskiet.

Terwyl mnr. Iep Kruger (56) sterwend in sy sitkamer was, het ’n rower sy vrou, Amanda (61), met ’n vuurwapen aangehou en van haar selfoon beroof.

Mnr. Kruger het omstreeks 11:40 in die sitkamer gesit en televisie kyk toe ’n rower hom oorval het. Sy vrou het in daardie stadium in die slaapkamer gelê en televisie kyk.

“Ek het skielik ’n geluid gehoor en toe breek ’n stoel.

“Die volgende oomblik hoor ek my man skreeu: ‘Nee! Nee! Nee!’ en toe klap daar twee skote,” het mev. Kruger gesê.

Sy het deur hul slaapkamer se skuifdeur na buite gevlug en was besig om haar buurman van haar selfoon te probeer bel toe ’n
rower haar oorval.

“Hy (die rower) het ’n vuurwapen op my gerig en toe vat hy my selfoon uit my hand en hardloop weg sonder ’n woord.”

Sy het daarna na haar man gehardloop en hom probeer help.

“Ek het probeer om hom op sy sy te draai sodat die bloed uit sy mond kon loop, maar hy was te swaar.”
Mev. Kruger het haar man gevryf, hom met ’n kombers toegegooi en aan hom gesê sy gaan hulp by die bure soek.

Sy het daarna in haar motor gespring en na die kleinhoewe langs hulle gery.

Sy het teruggejaag na hul hoewehuis, maar haar man was al dood.

“Die eerste koeël is deur die regterhand, deur die regterkant van sy gesig en by sy sleutelbeen in. Die tweede koeël is by sy een sy in en by die ander sy uit,” het sy gesê.

Sy het gesê hulle sou oor ’n week Botswana toe ry, maar nou het alles verander.

“My man het ’n groot hart gehad en was ’n goeie mens.

“Wat gaan ek nou sonder hom doen?”

Me. Hettie Jordaan van die Kameeldrift-Wes en omgewing se landelike beveiligingsektor het gesê kort ná die voorval het hulle die sirene aangeskakel om al die inwoners in die omgewing te waarsku gewapende rowers is in die omgewing doenig.

Volgens Jordaan is verskeie inwoners in die omgewing se sinkplate dieselfde aand gesteel.

Mnr. Nantes Kelder, hoof van gemeenskapsveiligheid van die burgerregte-inisiatief AfriForum en ondervoorsitter van die Hercules-gemeenskapspolisiërings-forum (GPF), het gister by die Kruger-huis gesê Suid-Afrikaners se huise het ’n “oorlogsone” geword.

“Ons bloei ons dood,” het Kelder gesê.

Insp. Patricia Simelane, polisiewoordvoerder, het gesê die polisie ondersoek die voorval.

Mnr. Kruger laat sy twee seuns, Shaun (27) en Wayne (25), agter.
 

- Beeld