Boere sonder roere kan nie, sê TLU SA

Hilda Fourie

’n Vuurwapen is vir ’n plaasboer soos ’n stuk gereedskap waarsonder jy nie kan boer nie.

Só het mnr. Bennie van Zyl, hoofbestuurder van TLU SA, eergister tydens ’n gedenkdiens vir slagoffers van plaasaanvalle by Fort Schanskop in Pretoria gesê.

Sowat 50 mense het dié geleentheid bygewoon.

In ’n brief gerig aan pres. Jacob Zuma het TLU SA gesê die ideaal van ’n vuurwapenvrye land is in kontras met die fisieke en sielkundige risiko’s wat deel van die daaglikse lewe in Suid-Afrika geword het.

“As politici en senior beamptes die polisie opdrag gee om vuurwapens te gebruik om misdaad te bekamp of te voorkom dat hulle slagoffers van misdaad word, moet dieselfde beginsel geld vir wetsgehoorsame burgers wat nie die luuksheid het om deur polisielede beskerm te word nie,” lui die brief.

“Hulle (die wetsgehoorsame burgers) het geen keuse nie as om verantwoordelikheid te neem vir die beskerming van hul lewens en eiendom en daarmee saam die polisie te help sonder enige erkenning of beloning.”

Luidens die brief is die feit dat die hoë vlakke van wraaksug “sonder enige vooraf waarskuwing” op slagoffers gerig is, kommerwekkend.

Mnr. Henk van de Graaf, TLU SA se assistent-hoofbestuurder van kommunikasie, het tydens dieselfde geleentheid ’n oproep op boere gedoen om na hulself te kyk.

“Sorg dat ’n wapen gelisensieer is, dat u hom by u het en dat hy gelaai is,” het Van de Graaf gesê.

“Moenie u wapen in dié tyd ingee nie.

“Doen wat u binne die wet moet doen sodat ons nie die (misdaad)statistieke opjaag nie.”

TLU SA het ’n beroep op Zuma gedoen om die verhouding tussen die polisie in landelike gebiede en die boere te ondersoek.

Volgens TLU SA bestee die meeste polisie in landelike gebiede meer tyd en energie om plaasbuurtwagte te monitor as om die misdadigers wat die probleme veroorsaak, te vang.

TLU SA Jongboere het in ’n veiligheidsverklaring van die regering en die polisie geëis “om ernstig te besin oor hul grondwetlike verantwoordelikhede en die herhaalde beloftes om lewe en eiendom te beskerm”.