4 polisielede vry nadat ma nie ‘verkragter’ kan eien
2009-11-13 22:30
Hilda Fourie
Vier polisielede is vrygelaat nadat ’n vrou nie een van hulle tydens ’n uitkenningsparade kon uitken as die een wat haar verkrag het óf die drie wat haar nie gehelp het nie.
“Hulle het nie een van die mense wat daardie aand nagskof gewerk het daar gehad nie,” het dié vrou (29), ma van ’n 18 maande oue seuntjie, gister gesê.
“Ek weet nie of hulle my probeer deurmekaar maak nie, maar dit was glad nie die mense wat daardie aand gewerk het nie.”
Mnr. Moses Dlamini, nasionale woordvoerder van die Onafhanklike Klagtedirektoraat, het gesê volgens die inligting wat hy het, “kon die slagoffer nie die verdagtes eien as die mans wat by haar verkragting betrokke was nie”.
Me. Delia de Vries van die regsfirma De Meyer & De Vries in Johannesburg, wat die vrou se saak behartig, het gesê dit het haar kliënt “presies 30 sekondes geneem om te sê hy is nie daar nie.”
Alle aanklagte is teen die inspekteur, konstabel en twee studentekonstabels van die Rustenburg-polisiekantoor laat vaar.
Een van dié vier is daarvan beskuldig dat hy die ma op 29 September in ’n badkamer by dié polisiekantoor met ’n dik swart rubberpyp oor die rug geslaan en toe verkrag het.
Sy was in aanhouding op ’n klag van diefstal, wat die volgende dag teen haar teruggetrek is.
Die ander drie is daarvan beskuldig dat hulle geweet het wat aangegaan het, maar niks gedoen het om haar te help nie.
Dlamini het gesê die ondersoek sal voortgaan, maar die vier polisielede is nie meer verdagtes nie.