Vrou swem ver om 9 hondjies se lewe te red

Korrespondent

Londen. – ’n Britse vrou het byna ’n kilometer ver geswem terwyl sy ’n krat met nege hondjies daarin gebalanseer het nadat haar seiljag aan die Turkse kus in die moeilikheid beland het.

Me. Laura Hughes (28) het aan die Daily Telegraph gesê die diere se veiligheid was haar grootste kommer.

Sy en mnr. John Cochrane (30), haar vriend, was verlede maand aan die seil om die Turkse kus toe stormwinde hulle van die jag gedwing het nadat die enjin gevrek het.

“Die boot was besig om vol water te raak. Ek het geweet as ons nie uitspring nie, gaan dit sink of omslaan. Ek het geen keuse gehad nie.”

Toe die twee aanvanklik besef het hulle is in gevaarwater, het hulle ’n noodsein uitgestuur waarop ’n Griekse boot gereageer het.

Volgens Hughes het die bemanning betaling van €10 000 (meer as R112 000) geëis, wat hulle nie kon bekostig nie.

Met slegs ’n lewensbaadjie om haar bo die water te hou, het Hughes haarself oorboord laat sak met die nege hondjies in ’n melkkrat.

Sy het die krat met een hand gebalanseer terwyl sy met die ander tot by ’n strandoord geswem het waar sy deur Duitse toeriste gehelp is.

“Ek het ’n paar keer water gesluk, maar is ’n redelike sterk swemmer. My ma het altyd gesê ek swem soos ’n rot met slegs my kop bo die water.”

Cochrane het met die twee groot honde – Ragga Muffin en Tiger Lily – waarvan eersgenoemde die nege kleintjies se ma is, na die wal geswem.