8 oorleef op boot deur hout te eet
2009-11-18 22:44
- Artikelopsies
- Deel
- Kry Beeld op
Sapa-AFP
Majuro. – Agt mans van Papoea-Nieu-Guinee het twee maande op ’n roeiboot in die Stille Oseaan oorleef deur die bas van dryfhout en die dop van kokosneute te eet.
Mnr. Nick Sales (29) het gesê die agt familielede het reënwater in hul 7m lange boot opgevang.
“Ons het die hout in die son gedroog en geëet. As ons drywende kokosneute in die see gekry het, het ons dit oopgebreek, die sap gedrink, die vrug en selfs die dop geëet,” het Sales vanuit sy hospitaalbed in die hoofstad van die Marshall-eilande hier gesê. Hulle het soms krappe gevang.
’n Amerikaanse vissersboot het Sondag sewe mans sowat 480?km van Papoea-Nieu-Guinee gevind.
Twee van die mans is op dié boot dood voordat dit Majuro eergister kon bereik. ’n 15-jarige seun het Vrydag – twee dae voordat hulle gered is – verdrink toe hy in die see gespring het om sy hemp terug te kry, het Sales gesê.