Pukke: Kroning ’n aand van pret en mooi mense

Die Puk-kampus se Mnr. en Mej. Kampus is verlede week tydens ’n karnavalskouspel in die Amfiteater gekroon.

Dié gala-aand het begin met die ringmeester, die kommunikasiedosent mnr. GP van Rheede van Oudtshoorn, wat in ’n hok van die dak laat sak is, terwyl ’n juggler en ’n man op stelte toertjies gedoen het.

Die Amfiteater het soos ’n ware sirkustent gelyk met rooi en wit gedrapeerde lappe en feetjieliggies. Die gaskunstenaars vir die aand was die plaaslike musiekgroep Bruce Noble.

Dit was egter Marlie Jonker, ’n derdejaar-BA (kommunikasie)-student, en Francois Naudé, ’n tweedejaar-BA (MBW)-student van Ratau, wat die kollig gesteel het toe hulle as Mnr. en Mej. Kampus aangewys is.

Tydens die vertoning Donderdagaand het die 24 finaliste eers in informele drag op die loopplank verskyn. Terwyl hulle toe in hul eie keuse van sirkusdrag verklee het, het ’n toorkunstenaar die gehoor vermaak.

Die vertoning is op ’n hoogtepunt afgesluit met ’n modeparade in formele drag.

“Dit was ’n lekker ervaring.

“Ek het soveel opregte mense ontmoet. Dit gaan vir my ’n eer en ’n voorreg wees om ons universiteit in Stellenbosch te gaan verteenwoordig,” het Jonker pas ná haar kroning gesê.

“Dit was onverwags, maar God is ongelooflik en weer eens het Hy vir my deurgebreek,” het Naudé gesê.

Chrislemien Groenewald, uitvoerende komiteelid wat die kompetisie reël, som die aand in ’n paar woorde op: “The show says it all”.

Anke-Marie Bronkhorst en Cronjé Wentzel is as eerste prins en prinses gekroon en Kuketso Theko en Juan Lombard as tweede prins en prinses.