Pukke: Pukke gee yslike R1,8 miljoen aan behoeftiges
2011-08-15 09:57
- Artikelopsies
- Deel
- Kry Beeld op
Die Puk-kampus se SJGD-komitee het vir die termyn van 2010/’11 meer as R1,8 miljoen aan behoeftige mense en organisasies uitbetaal.
Dié termyn is onlangs op ’n hoogtepunt afgesluit tydens die jaarlikse uitbetalingsfunksie waar ’n hele paar harte oorgeloop het van vreugde.
Jean-Marc Stidworthy, SJGD-voorsitter, verduidelik dié uitbetalingsgeleentheid is ’n manier vir SJGD se borge om te kan sien hoe hul geld aangewend word.
Die aansoeke vir die uitbetalings is op 15 Julie geopen en organisasies en individue in die Potchefstroom-omgewing, buiten SJGD se bestaande projekte, kon aansoek doen.
SJGD het toe die mees behoeftige aansoeke aanvaar en het vanjaar ’n bedrag van R147 765 by dié geleentheid uitbetaal.
Stidworthy vertel dié termyn was ’n reuse-sukses. “Ons het meer as R1,8 miljoen aan organisasies uitbetaal. Die grootse bedrag wat aan ’n organisasie uitbetaal is, was R483 782 aan Ons Hulde-ouetehuis in Potch. Dit is die ouetehuis waarvan die dak vroeër vanjaar ingeval het.
“Ons het aan so ongeveer 57 organisasies uitbetaal,’’ sê Stidworthy.
Behoeftige studente het ook geldelike hulp ontvang vir onder meer kos, verblyf, studiegeld en vervoer en beurse is ook toegeken vir navorsing in gemeenskapsdiens.
Die Kankervereniging van Suid-Afrika (Kansa) het verder groot bedrae ontvang wat ingesamel is met projekte soos Kleur & Skeur, Jail & Bail en Cut & Tag wat op kampus gehou is. Laasgenoemde het ’n reuse-bedrag van R95 000 ingebring.
Individue het ook geld ontvang vir onder meer die aankoop van mediese toerusting en kankerbehandeling.