Tuks: Uiteindelik meer plek vir parkeer

Ongeveer 667 van die 1 000 parkeerplekke by die nuwe kampusparkade langs die Musaion is nou vir studente aan die Universiteit van Pretoria (UP) beskikbaar.

Volgens die universiteit se afdeling geriewe­bestuur is die ander 333 parkeerplekke toegeken aan universiteitspersoneel wie se name op parkeer-waglyste was.

Bouwerk aan die parkade, waar die Aula se parkeerterrein eers was, het verlede jaar begin.

“Geen student sal ’n parkeerplek kan bespreek nie. Wie eerste opdaag, het voorkeur om eerste te parkeer,” sê die UP se geriewebestuurder, mnr. Hennie Coetzee.

Dinge word egter so maklik moontlik gemaak vir studente en ’n elektroniese bord is aangebring wat die getal oop staanplekke op elke vlak van die parkade bereken en dié getal vertoon.

Die parkade is, soos wat aan die begin van die jaar beplan is, op 6 Julie oopgestel en word deur Katanga Parking Services bestuur.

Die universiteit se veiligheidsdienste sal steeds toegang tot die parkade reguleer soos by enige ander hek. Studente kan slegs toegang vanaf Universiteitsweg tot die parkade verkry.

Luidens die berig op die universiteit se webtuiste sal die parkade ook ingespan word as parkeerplek vir toeskouers wat byeenkomste en wedstryde in die Loftus Versfeld-stadion bywoon.

Studente kan gebruik maak van ’n voorafbetaal-stelsel, wat sal beteken hulle hoef nie altyd kleingeld byderhand te hê om vir parkering te betaal nie.

Meld by die Katanga-beheerkamer (by die parkade) aan en maak ’n parkeerrekening oop waarin jy vooraf geld kan inbetaal.

Jou studentekaart word dan geaktiveer en die betrokke bedrag vir jou parkering word afgetrek soos jy van die parkade gebruik maak. TuksMobi is nog nie as betaalmetode bevestig nie.