Bruid van die jaar 2009
2009-08-21 10:18
- Artikelopsies
- Deel
- Kry Beeld op
Groot pryse is op die spel
Die wenner van Beeld se Bruid van die Jaar-kompetisie vir 2009 stap weer met ’n klomp eksklusiewe pryse weg.
Jenna Clifford skenk aan die wenner Renaissance-juweliersware ter waarde van R10 000, huisware van R10 000, ’n R36 000-vakansie van vier dae vir ses mense by Lake Longmere – Clifford se gastehuis in Mpumalanga – en aan die wenbruid se ma huisware van R5 000.
Die 11 ander finaliste wen elk ’n Jenna Clifford-geskenkpak met huis- en juweliersware van R3 000.
Verskeie vakansies is ook vanjaar op die spel.
Die wenbruid ontvang ’n vakansie vir twee van drie nagte (bed en ontbyt ingesluit) in die vyfster-Zanzibar Serena Inn buite Stone Town in Zanzibar. Dié prys sluit die koste van die retoervlugte van Johannesburg, geborg deur die 1time-lugdiens, in.
Die naaswenner wen ’n wegbreek vir twee van twee nagte (bed, ontbyt en aandete) in die vierster-
Valley Lodge buite Magaliesburg.
Die bruid wat in die derde plek eindig, wen ’n tweedagwegbreek (bed en ontbyt) in Clico-gastehuis in Rosebank, Johannesburg
Die Huisgalery skenk drie ongeraamde skilderye (deur Peet Booysen, Sandy Esau en Tania du Toit) aan die wenbruid, twee ongeraamde skilderye (deur Esau en Du Toit) aan die bruid in die tweede plek en aan die ander finaliste elk ’n kunswerk van Esau en ’n ongeraamde skildery van Du Toit.
Sealy Posturepedic skenk aan die wenbruid ’n bed en beddegoed van R30 000.
Van die modeontwerper en stilis Simon Rademan ontvang sy ’n konsultasie, die ontwerp en maak van ’n eksklusiewe aandrok met bypassende juwele; ’n elegante, sensuele nagrok en ’n poeierjas.
Swartland-wyne skenk 24 bottels wyn aan die wenbruid en aan die finaliste elk ’n kis wyn.
Die winkelsentrums Clearwater Mall en Woodlands Mall gee geskenkbewyse van R10 000 aan die wenbruid; R5 000 aan die bruid in die tweede plek en aan die ander finaliste elk ’n R1 000-geskenkbewys.
Nimue skenk skoonheidsprodukte van R5 000 aan die wenbruid en R2 500 se produkte aan die ander finaliste.
Canon gee aan die wenbruid ’n videokamera en aan elk van die finaliste ’n Powershot SX110 IS- digitale kamera.
Nie net die finaliste in vanjaar se kompetisie wen pryse nie! Elke bruid wat inskryf, kom ook in aanmerking vir die volgende:
Jenna Clifford borg vanjaar ’n geskenkpak wat maandeliks toegeken word aan die bruid met die mees romantiese verhaal van hoe sy en haar man mekaar ontmoet het;
Alle bruide wie se foto’s in die koerant gepubliseer word, kom in aanmerking vir ’n spesiale afslagaanbod as hulle hul eerste huweliksherdenking romanties by Avianto in Muldersdrift gaan vier.
Beeld se Bruid van die Jaar vir 2009 word volgende jaar op 12 Maart by Avianto aangewys – in same-werking met die bruilofontwerper Lorraine Ehlers van Papilio Designs.
Wedstrydreëls
Slegs bruide wat in 2009 getroud is, mag inskryf. Bruide mag net inskryf vir die maand waarin hulle getroud is.
Beeld behou die reg voor om huweliksertifikate aan te vra.
Hou by die sperdatums. Tik jou antwoorde op die volgende vrae op ’n A4-papier:
1. Waar het julle ontmoet?
2. Hoe lank ken julle mekaar?
3. Watter beroepe beoefen julle?
4. Wat is jul belangstellings?
5. Wat is jul definisie van ’n gelukkige huwelik?
Verstrek die bruid en bruidegom se naam, jul troudatum, adres, e-pos-adres en kontaknommers.
Plak ’n duidelike kop-en-skouers-foto, asook ’n vollengtefoto van die bruid (kleur of swart-wit, enige grootte) op twee aparte kartonne van A4-grootte.
Skryf die bruid se naam agterop die karton. Geen fotostate of e-pos-inskrywings nie.
Foto’s word nie teruggestuur nie.
Geen werknemer of familie van die borge of van Media24 mag deelneem nie.
Beeld aanvaar nie verantwoordelikheid vir borge wat nie hul verpligtinge nakom nie.
Nie alle inskrywings word gepubliseer nie. ’n Eerste keuring word deur ’n paneel gedoen.
Beeld se redakteur behou hom die reg voor om finaliste te diskwalifiseer wat in enige stadium só optree dat dit Beeld, die kompetisie of die betrokke finalis(te) se goeie naam in gedrang bring.
Dit sluit gedrag in (maar is nie daartoe beperk nie) wat lei tot die finalis se inhegtenisneming, hofverskyning, betrokkenheid by ’n polisie-ondersoek (selfs voordat die finalis aan ’n misdryf skuldig bevind word) en onwelvoeglike of skandalige gedrag – hetsy dit in die media gepubliseer word of nie.
Die beoordelaars se besluit is finaal en geen korrespondensie word oor die wedstryd gevoer nie.
Rig inskrywings aan Bruid van die Jaar 2009, Posbus 595, Auckland Park 2006 of lewer dit af by Mediapark, Kingsway 69, Auckland Park, Johannesburg voor 12:00 op die sluitingsdag.
Geen inskrywings word by Beeld se Pretoria-kantoor aanvaar nie.
Vir navrae oor die kompetisie bel Annerien du Toit by 011 713 9362.
Stem só
Lesers wat vir hul gunstelingbruid wil stem, kan haar foto uitknip, dit agterop ’n poskaart of koevert plak en saam met hul naam, adres en kontaknommers stuur aan: Bruid van die Jaar 2009, Posbus 333, Auckland Park 2006. Of kom lewer jou stemme af by Beeld se kantore in Johannesburg.
Skryf in voor dié datums
Junie-bruide:
26 Augustus
Julie-bruide:
26 Augustus
Augustus-bruide:
30 September
September-bruide:
28 Oktober
Oktober-bruide:
25 November
November-bruide:
30 Desember
Desember-bruide:
27 Januarie 2010