Kunswerke van glas
2012-02-22 06:00
Andrie Buys droom oor ’n plekkie by die see, maar intussen skep hy kunswerk uit glas in die stad.Terésa Coetzee het gaan kyk waar hy bly én skep.
Eendag gaan hy nog sy eie unieke dolfynwinkel in Hermanus oopmaak waar die mooiste glasware gevind kan word... Ja, hy en die mense van die dorp gaan glas herwin en enigiets met ’n dolfyntema daaruit skep. Dit is Andrie Buys van Pretoria se droom. En hy weet dit gaan werk – dis net ’n kwessie van tyd.
Maar vir tyd en wyl, tot hy daardie droom laat waar word het, sal hy daar uit sy huis in Capital Park sy kunswerke van glas maak. Enigiets van juweliersware, wasbakke, teëls, lamp- en ligskerms, olielampies, kersblakers, slaaibakke, ornamente tot kombuiskasdeure, watervalletjies, noem maar op.
En deel van sy inspirasie put hy uit sy huis – ’n unieke konstruksie wat aan die bouer Christo Wolvaardt behoort.
WAAR ALLES BEGIN HET
Buys se belangstelling in glas het meer as tien jaar gelede posgevat nadat hy ’n keramiekkursus by ’n Duitse vrou in Meyerton gevolg het. Voor dít was hy ’n forensiese wetenskaplike by die Suid-Afrikaanse Polisiediens.
Later jare het hy sy eie restaurant-galery in Hoedspruit oopgemaak wat hy Kaya Andrie genoem het, maar toe hy in 2001 stad toe getrek het, het hy besluit om voluit net met glas te werk.
“Ek het verskriklik baie geëksperimenteer voor ek eindelik begin besef het wat werk en wat werk nié. Met glas moet jy presies weet watter temperature om te gebruik wanneer jy dit bak,” vertel hy.
Hy was heeltyds bestuurder by ’n restaurant en baie van die glas wat hy herwin, kom van die blou waterbottels van glas wat in die restaurant voorgesit is. Al die vorms waarin sy glas gegiet word, maak hy ook self uit ’n stof van vlekvrye staal waaroor hy nie te veel wil verklap nie. Elke vorm is handgemaak en uniek, en so ook sy produkte. Deesdae word baie van sy glaswerk by ’n kunsgaleryin Waterkloof uitgestal.
SKEPPENDE RUIMTE
Hy maak sy glaswerke uit sy huis wat aandag trek met sy unieke voorkoms.
“Die oomblik toe ek in hierdie huis met sy industriële voorkoms en gevoel gestap het, het ek geweet dit is waar ek wil bly.
“Buiten die asemrowende uitsig, werk die rowwe, ongekunstelde voorkoms baie goed saam met al my glasgoed,” sê Buys.
Wolvaardt is bekend daarvoor dat hy rou bakstene en groot, swaar sementblokke en pilare gebruik.
Buys se eie smaak is eklekties en die meubels in die huis is ’n mengsel van sy eie en sy lewensmaat se goed wat hulle so deur die jare bymekaargemaak het.
“Nie een van ons is ingestel op modes en giere nie en ons hou van tydlose goed,” sê hy.
Die kombuis werk byvoorbeeld baie goed met die mengsel van vlekvrye staal, hout en glas terwyl die spaarkamer ’n klassieke wit is.
“Ons huis was eintlik voorheen ’n restaurant en die groot vlekvryestaal-waaier van die kombuis vorm nou ’n interessante bykomstigheid in die vertrek,” glimlag Buys.
Hulle bestee die meeste van hul tyd buite op die stoep en wanneer hulle onthaal, word dit gewoonlik ook daar gedoen.
En as hulle nie onthaal nie, sit hulle sommer net daar en droom oor die walvis- en dolfynprojek in Hermanus. Eendag...
- Vir bestellings of meer inligting stuur vir Buys ’n e-pos by anbuys@hotmail.com of skakel 084 709 2503.
’n Watervalletjie bring kalmte na die tuin.
Die uitsig vanaf die groot buitestoep van Andrie Buys se woning.
Die kombuis werk baie goed met sy unieke kombinasie van hout, vlekvrye staal, glas en rou bakstene.
Die groot waaier wat voorheen in die kombuis was, vorm nou ’n unieke afronding in die spaarkamer.
Andrie Buys voor die unieke huis wat deur die bouer Christo Wolvaardt gebou is.
Ru en afgerond. Hier kom Buys se eklektiese styl tot sy reg.
Voor die groot vensters is geen blindings of gordyne nie, want dit sal net die pragtige uitsig oor Pretoria bederf.