Nie vir koekies nie
2010-03-30 21:13
Ilse Krige
’N Mini-koffietafelboek oor die vagina. Dalk ’n leesbare ekwivalent van die toneelstuk The Vagina Monologues, wat ook al in Suid-Afrika te sien was.
’n Spogboek, smaakvol geïllustreer met klassieke kunswerke en moderne lyfkunstenaars se handewerk. Geen grafiese foto’s, mediese jargon of tegniese sketse nie.
Nog nooit daarvan gehoor nie?
Me. Maritza Breitenbach, ’n enkelma van Somerset-Wes met twee dogters op universiteit en ’n tienerseun, kon ook nie so iets opspoor nie.
Toe skryf sy maar The Cookie Book: Unveiling Women’s Secret.
“Met dié boek het ek probeer om die gaping tussen die kliniese, koue mediese wetenskap aan die een kant en pornografie en erotika aan die ander kant te oorbrug.
“Nou kan vroue van enige ouderdom op ’n gemaklike, ligvoetse wyse die wonderlike verborge geheime ontdek van dít wat ons as vrou definieer,” verduidelik sy.
Breitenbach erken sy het nie ’n mediese agtergrond nie.
Sy voeg grappenderwys by: Aangesien sy die afgelope 45 jaar “die wettige eienaar van my eie Eden” is, stel dit haar in staat om in geselstaal dié sensitiewe en dikwels taboe onderwerp aan te pak.
“Ek het ’n voorliefde vir navorsing. Ek wou graag iets takel wat ek beskou as ’n behoefte, iets wat waarde kan voeg tot die gehalte van ons lewe,” motiveer sy haar keuse.
Breitenbach het onlangs ’n meestersgraad in toegepaste biomediese etiek aan die Universiteit van Stellenbosch behaal.
Sy beplan om binnekort ook ’n doktorsgraad in filosofie aan te pak.
Sy is boonop ’n praktiserende beeldhouer en van haar kunswerke is aangekoop deur gesogte instellings in die Wes-Kaap.
Met haar fyn aanvoeling vir die kunste het sy die boek kleurryk geïllustreer met gepaste, nie-eksplisiete skeppings van befaamde kunstenaars, onder wie Auguste Rodin, Pablo Picasso, Pierre-Auguste Renoir en Sandro Botticelli.
“Die boek neem ons op ’n reis deur die geskiedenis en kyk na die oorsprong van geboortebeperking, oeroortuigings oor selfstimulering, die sogenaamde ‘rondreisende uterus’ en die tatoeëring en piercing van ons liggaamsdele,” sê sy.
Vroue, ook jong meisies, wat te skaam is om hul dokters te vra, kan waardevolle raad oor vaginale afskeidings, infeksies en seksueel oordraagbare siektes in dié boek van 200 bladsye kry.
Breitenbach bespreek die uitwerking wat puberteit, seksuele omgang, swangerskap, die geboorteproses en menopouse op die vagina het.
Die kompleksiteit van die klitoris, die G-kol en die maagdevlies word ook in eenvoudige taal ontleed.