Die Seb wys al vroeg hy soek 9de wêreldtitel
2012-01-26 06:00
Loeb het in dié internasionale tydrenreeks se eerste ren van die nuwe seisoen met gemak gewen in sy Citroën DS3 nadat hy van begin tot einde voor gejaag het.
Die Spanjaard Dani Sordo was tweede in ’n Mini, gevolg deur die Noorweër Petter Solberg in ’n Ford Fiesta.
Die Monte Carlo-tydren het ’n welkome terugkeer na die WRC-reeks gemaak nadat dit lank nie op die kalender was nie.
Dis ook meer as vier dekades sedert ’n Mini daar aan ’n tydren deelgeneem het. Rauno Aaltonen het laas in 1967 in die “Monte” in ’n Mini gewen in die jare toe die Mini’s koning van die bergpaadjies was.
Deesdae se Mini’s is natuurlik ’n bietjie anders as die buksies waarmee in die jare sestig 60 gejaag is.
Vandag se Mini is maar eintlik ’n baba-BMW en ook heelwat groter as toentertyd se ikoniese rondritsers.
Tog behoort sy puik tweede plek ’n aanduiding te wees van die gedugtheid van dié nuwe span in die reeks. Die Mini’s sal bes moontlik Loeb se grootste uitdagers wees.
Terloops, die Fransman het verlede jaar sy agtste WRC-titel op ’n ry ingeoes en mik vanjaar na ’n ongekende negende titel.
Hy is ook onlangs in Frankryk as dié land se gewildste sportman aangewys.
Dit was ook ’n welkome terugkeer na die podium vir die veteraan en oudkampioen Solberg.
Solberg het weer ’n kontrak losgeslaan om vir die Ford-fabriek- span te ry. Dis nou nadat hy jare sonder ’n fabriekskontrak moes deelneem.
Die vlieënde Fin Mikko Hirvonen het in die vierde plek geëindig.
Hirvonen ry vanjaar nogal vir Citroën nadat hy die laaste paar seisoene ’n getroue Ford-jaer was.
Loeb se sege in sy “tuisren” was beslis nadruklik. Nie net het hy die maksimum van 25 punte met sy oorwinning ingeoes nie; hy het ook in die finale krag-skof teen die Col de la Madone (oor 5,1 km) uit gewen wat aan hom ’n verdere drie punte besorg het.
Die res van die jaers sal dus hul jaagwerk moet ken as hulle die Fransman vanjaar in toom wil hou.
Hy is duidelik op koers om nog ’n titel agter sy naam te kan skryf, maar soos Loeb ná die tyd gesê het: Dis wel gaaf om voor sy “tuisskare” te kon wen, maar dit is sy agterplaas en word op teerpaaie – sy sterk punt – beslis.
Die volgende ren is die Sweedse tydren (10 Februarie) en daar wag sneeubedekte paadjies op die jaers. Dit is daarom geen verrassing nie dat die Skandinawiese jaers daar baljaar op die podiumtrappe.
Dis dalk net die geleentheid wat Solberg en Hirvonen nodig het om Loeb vroegtydig te kan inkatrol.
Welkom terug! Petter Solberg jaag vanjaar weer vir ’n fabriekspan (Ford) nadat hy lank op sy eie moes klaarkom.