Ons praat hier van Nissan se GT-R nadat die nuwe, opgeknapte model
pas in Suid-Afrika bekend gestel is.
Al ooit gewonder waarom ’n sportwa uit Japan soveel
aantrekkingskrag het?
Want hierdie sportwa maak nie net volbloed-sportmotors uit
Duitsland en Italië skrik rondom renbane nie, maar ook vanweë die prys – want
dit kan in sportmotorkringe as ’n winskopie beskryf word.
Die reeds asemrowende verrigting van die GT-R word nog ’n raps
aangejaag en die enjin skop nou 397 kW. Nie sleg vir ’n 3.8 liter-V6 met
turbo-aanjaging nie. Voorheen was dit net 390 kW. Wringkrag klim van 612 tot 628
Nm en die massiewe hoeveelheid trekkrag is reeds teen 3 200 r/min beskikbaar.
Die petrolverbruik, al is dit bloot van akademiese belang in ’n superwa, daal
ook ’n raps in die nuweling.
Versnelling bly min of meer dieselfde en om by 100 km/h uit te kom
neem ongeveer 3.5 sekondes. Dit is amper so vinnig soos wat jy mes kan sê en sy
asem gaan eers anderkant 300 km/h opraak.
Die veranderings aan die blitswa, wat met al vier sy wiele trek,
sluit ook verstelling aan die veerstelsel in.
Die enjin se reaksietyd en sy trekkrag teen lae snelhede is
verbeter danksy beter lugvloei met nuwe inlaatspruitstukke vir elke
silinderbank, meer lug vir die tussenverkoeler, nuwe uitlaatstelsel en ’n meer
kompakte katalitiese omsetter aan die onderkant van die voertuig wat ligter en
meer doeltreffend is.
Van die ratkaskomponente is verander om ’n beter oorskakelgevoel te
bied en die kas is boonop stiller.
Die bakwerk en onderstel is verstewig vir minder vibrasies deur ’n
nuwe vervaardigingsproses wat baie meer gesofistikeerd is as voorheen.
Vanweë die feit dat die GT-R dikwels net deur sy bestuurder/eienaar
gebruik word en sommige van die onderstel se gewig aan die regterkant geleë is,
is die skokbreker en kronkelveer aan die linkerkant harder gestel om
ewewigtigheid teweeg te bring as die GT-R in beweging is.
Aan die binnekant is van die instrumentasie se agtergrondbeligting
nuut (blou) en is daar ’n truratkamera.
Die Bose-klankstelsel (uitgespreek Bouz en nie bose nie!) is
aangepas.)
Die twee modelle wat plaaslik te kry is se pryse is:
GT-R Premium Edition – R1 347 000.
GT-R Black Edition – R1 397 000.
Nissan se jongste weergawe van sy vuurwa, die GT-R, is hier en die
kookwater-Nissan sal menige supersportmotor onder die stof ry.
Die binnekant van die GT-R het ’n ietsie van Tokio in die nag,
met ’n horde liggies en metertjies, alles wat help om die ry-ervaring nog meer
besonders te maak. Daar is ook nou satellietnavigasie
beskikbaar.