- Artikelopsies
- Deel
- Kry Beeld op
Bakkie se afskryf wekroep vir my tiener
deur Matré Schoonraad
2009-11-08 06:45
Ons 19-jarige seun het Saterdag om 01:00 my man se bakkie in ons straat afgeskryf.
Nes baie ouers het ek al ontelbare kere probeer aan die slaap raak, met die wete my kind is uit vir die aand, ontelbare gebede, wat hom opdra aan die Here, en vra dat hy asseblief veilig moet huis toe kom, en as ek hoor hy is terug, dan weer bid, en baie dankie sê dat hy veilig terug is.
As hulle tot baie laat uitbly, en jy is bekommerd, juis dan kan jy hulle nie in die hande kry nie, want die selfoon is af. Die eenvoudige verduideliking dat die battery pap was, moet jou nou maar gerusstel, en jy moet dit aanvaar.
Wat ek eintlik wou sê, is: Ek het al ontelbare kere in die bed gelê en gewonder of ek ook eendag ’n oproep gaan kry van my kind wat in ’n ongeluk was. En toe gebeur dit Saterdagoggend...
Ek was net baie, baie gelukkiger as so baie ouers, want sien, dit was my eie seun wat my gebel en gesê het: “Ma, kom aseblief gou!! Ek het die bakkie gerol.” Hy en my nefie was saam.
Dit kon so anders gewees het; my kind of nefie kon dood gewees het, en dan moes iemand anders my bel, dalk nog van my seun se foon af. Ek sê net weer dankie vir die Here dat hy my kind gespaar het. Ek weet dat hy ’n wake-up call gekry het, en dis net hartseer dat daar altyd eers iets drasties moet gebeur!
Tieners, neem jul ouers in ag, laai jou foon se battery voordat jy uitgaan; kom vroeër huis toe. Wil julle regtig jul ouers oud maak voor hul tyd?