- Artikelopsies
- Deel
- Kry Beeld op
Bybel nie opgewasse teen wetenskap
deur Willie Collins van Alberton skryf:
2011-12-29 21:14
Willie Collins van Alberton skryf:
Dit raak vir predikante al hoe moeiliker om hul leerstellings teen die wetenskap te verdedig, daarom gebruik hulle dan onwaarhede en wanvoorstellings om hul stellings te probeer staaf.
In Koos Mouton se brief “Lukas veel geloofwaardiger as Thomas se evangelie” (Beeld, 29 Desember) verwys hy na Lukas asof hy die skrywer van die Lukas-evangelie sou wees.
Koos en Bybelwetenskaplikes weet die evangelies is jare ná Jesus se dood deur ander skrywers geskryf – in die Lukas-evangelie se geval meer as 50 jaar ná Jesus se dood, maar gemeentelede word nie daaroor ingelig nie.
Koos behoort ook te weet dat maagdelike geboortes in die antieke tyd volop was. Antieke gode soos Mitras, Dionisus, Osiris en Horus, helde soos Herakles en vele ander was almal produkte van maagdelike geboortes.
Jesus se storie was net ’n na-apery van ’n ou gewoonte – om iemand wat ’n held in skrywer se oë was goddelike status te gee.
Dis ook ’n wetenskaplike feit, wat Koos of enigiemand anders by enige paleo-antropologie-departement by ’n universiteit kan bevestig, dat daar nie ’n Adam en Eva bestaan het nie. Daar was dus ook nie ’n sonde wat van hulle oorgeërf word en waarvoor Jesus moes sterf nie.
Waarom is hy dan gekruisig? Om ingelig te wees moet ’n mens boeke lees soos Barry Wilson se How Jesus Became Christian, Sakkie Spangenberg se Jesus van Nasaret en Bart Ehrman se Misquoting Jesus.
Predikante sit met ’n dilemma. Indien hulle die waarheid van preekstoele af verkondig, sal gemeentelede nie meer kerk toe kom nie, sal daar nie meer inkomste wees nie, en spoedig sit hulle sonder werk.
Gemeentes loop reeds leeg omdat mense meer en meer self begin dink. Dis insiggewend dat drie gemeentes se lede op ’n Kersfeesoggend in een kerk pas waar Koos preek.