- Artikelopsies
- Deel
- Kry Beeld op
DA, OD volg nie storielyn, maar herskryf dit
deur Francois Bekker van Lynnwood skryf
2010-07-29 22:35
Daar is drie vereistes waaraan politieke partye moet voldoen om kiesers se aandag te trek: politiek wat die verbeelding aangryp, beginselvaste beleid en visie.
Die samevoeging van die Demokratiese Alliansie en die Onafhanklike Demokrate voldoen aan al drie dié vereistes.
Wat visie betref, besef sowel die DA as die OD dat die partypolitieke situasie in Suid-Afrika dringend weggelei moet word van rasgegronde politiek.
Rassenasionalisme is ’n resep vir mislukking. Dit het tragiese gevolge onder die Nasionale Party gehad en die ANC is besig om daardie foute skaamteloos te herhaal.
Verbind tot ’n grondwetlike demokrasie waarin alle mense se regte beskerm word deur onder meer ’n onafhanklike regbank bied die OD en die DA alle kiesers, ongeag ras of geloof, ’n politieke tuiste waar ’n sinvolle en billike toekoms vir alle landsburgers beding kan word.
Die dinamiese persoonlikhede van Helen Zille en Patricia de Lille laat hulle nie voorskryf deur siniese ontleders of doemproefete nie.
Hulle volg nie ’n storielyn nie, maar herskryf die Suid-Afrikaanse verhaal.
So beskou is die samewerking van die DA en OD innoverend, heldhaftig en bemoedigend. En dis waaroor toekomsgerigte politiek gaan: Die skep van hoop ondanks die struikelblokke.