- Artikelopsies
- Deel
- Kry Beeld op
Deon se ‘Tree aan!’ leen baie by dié drama
deur Paul Morris van Johannesburg skryf
2011-07-26 00:07
In talle opsigte is Deon Opperman se musiekspel Tree aan! feitlik identies aan Anthony Akerman se drama Somewhere on the Border.
Nogtans verteenwoordig dit twee heeltemal verskillende uitgangspunte en herinneringe aan die Grensoorlog: eersgenoemde is ’n nostalgiese, gereinigde weergawe van die weermagervaring en laasgenoemde wreedaardig eerlik. Ek was ’n jaar lank op die grens en verskeie maande in Angola en meen Suid-Afrikaners behoort die waarheid te hoor oor wat soveel van ons beleef het.
Dit is vir my bitter jammer dat ’n kommersieel geslaagde produksie soos Tree aan! die harde werklikheid, afgryse en morele dilemmas wat talle van ons in die gesig gestaar het, so opsigtelik vermy.
Aangesien Opperman in die oorspronklike plaaslike rolverdeling van Somewhere on the Border was, is dit verstommend dat hy so baie by Akerman se werk “geleen” het.
Dit is op sigself veel meer gewaagd as wat hy met Tree aan! opgedis het: ’n witgekalkte en sentimentele prentjie.
Ek wil my medeveterane wat Tree aan! gesien het, noop om Somewhere on the Border by te woon en self te besluit watter aanbieding julle wedervaringe die akkuraatste weerspieël.