- Artikelopsies
- Deel
- Kry Beeld op
Dis goed dat ‘kapitalisme’ krisis beleef
deur P.J. du Plessis van Mondeor skryf:
2012-02-08 22:45
Leopold Scholtz se artikel “Vadertjie staat kan nie” (7 Februarie) het betrekking.
Ek weet nie wat ’n mens die ekonomiese stelsel noem wat nou onder die dekmantel van kapitalisme bedryf word nie. Dit is ’n mengsel van gierigheid, inhaligheid, uitbuiting en ’n gevoel van: Ek is geregtig daarop om alles te vat. Kapitalisme is dit nie.
Elke krisis wat die kapitalisme beleef het, kan na gierigheid, korrupsie en bedrog teruggevoer word.
Daar is werklik iets ernstig fout as die ou bo in ’n maatskappy tot 400 keer meer as die ou onder verdien of as die finansiëledienstesektor die hoogs betaalde sektor geword het en bankbase miljoene der miljoene vergoeding kry.
Adam Smith, die vader van kapitalisme, het nie regtig ’n nuwe ekonomiese stelsel voorgestel of voorgeskryf nie. Hy het eintlik bloot die natuur van die mens vergestalt in sy opmerking: “It is not from the benevolence of the butcher, the brewer or the baker that we expect our dinner. But for their regard of their own interest.”
Dit is die basis van kapitalisme en die basis van die menslike natuur.
Die mens stel sy eie belang voorop. Die bakker gaan net brood bak as hy dit teen ’n goeie prys kan verkoop.
Dit is eintlik goed dat die “kapitalisme” nou ’n ernstige krisis beleef.
Dit sal hom tot selfondersoek dwing en hy sal beter anderkant uitkom... totdat gierigheid weer oorneem.
Baie gaan in die proses seerkry, maar hulle gaan die twee groot waarhede van die lewe weer besef: Jy kan nie meer geld uitgee as wat jy het nie en skuld moet altyd terugbetaal word.