- Artikelopsies
- Deel
- Kry Beeld op
Ek glo ook dat God in ons koppe ‘gebeur’
deur Proponent Willem Bakkes skryf:
2010-02-08 21:22
Ek is ’n groot bewonderaar van Klaas Hendriks en is so bly dat hy selfs Beeld gehaal het. Sy punt is immers dat God nie bestaan nie, maar gebeur.
My punt is ook dat God gebeur, ek voer die konklusie net een stap verder: God gebeur in ons koppe. Dis net soos ’n kind wat in ’n stadium bang raak vir spoke, iets gebeur in die kop. Later jare kan iets anders weer in die kind se kop gebeur wat hom dalk laat afsien van angs vir spoke.
Ek kan Klaas se isolasie verstaan, want ek het myself geïsoleer in die NG Kerk, waarvan ek ’n proponent is, verbonde aan die gemeente Aasvoëlkop in Johannesburg en die naaste wat ek seker aan ’n geestelike tuiste kan kom in die omtrek waar ek woon.
Nietemin swyg ek oor my sienings en weet dat mens maar versigtig moet wees wat jy aan die publiek verkondig, want daar is mense wat baie onverdraagsaam is en mens skade wil berokken as jy ’n meningsverskil het oor geloofsake.
Om te swyg is seker die maklikste uitweg, want dit is wat die meeste geestelikes met ’n goeie teologiese opleiding doen wat ’n wetenskaplike lees van die antieke Bybelse teks en die interpretasie van kerklike dogma betref.
As ek in mense se geselskap is, bly ek eerder stil en luister maar, want ek het ontdek dat mense nie hou van mense wat hulle slim hou nie. Omdat ek ’n introvert is, het ek geen probleme daarmee nie. Wanneer dit egter oor godsdiensaangeleenthede gaan, verstik ek dikwels in die stilligheid in my spoeg oor die selfversekerdheid waarmee mense sogenaamde waarhede aan die groot klok hang.
Ek kan mense tog nie prontuit laat verstaan dat hulle geen begrip het van die histories-wetenskaplike lees van tekste nie.
Tog moet mens soms die stoute skoene aantrek en mense laat verstaan dat jy glad geensins soos “almal” dink nie. Dus stel dit ek saam met Klaas dat God nie bestaan nie. As die laaste mens op aarde sterf, is God ook daarmee heen, want dan kan niemand God meer in ’n menslike lyf konstrueer nie.
My vriende kla dikwels dat ek goed veels te ingewikkeld probeer verduidelik, maar ek hoop ek het die saak eenvoudig genoeg gestel. Ek stem nie saam met alle kontoere van Klaas se denke nie, maar oor die kern is ek dit met hom eens.