- Artikelopsies
- Deel
- Kry Beeld op
Gesprek met NGK gaan wel voort
deur Ds. Peet Coetzee van Potch skryf:
2012-02-06 22:08
Ek is oortuig dat kerklike sake op ’n kerklike wyse hanteer moet word.
Juis daarom wou ek nie betrokke raak by korrespondensie oor die afgelope sinode van die Gereformeerde Kerke in Suid-Afrika (GKSA) nie.
Willem Pretorius se opmerking in Beeld van 3 Februarie dat hy met hartseer gelees het dat die GKSA aangedui het “dat hulle gesprekke met die NG Kerk gaan opskort”, is ’n leuen.
Ek sal dankbaar wees as hy sy bron bekend sal maak.
Die werklike feite van die besluit oor samesprekings met die NG Kerk is die volgende: Die sinode van die GKSA se deputate wat met die NG Kerk skakel word genoem Deputate Ekumenies Binnelands. Hierdie deputate het ’n “memorandum van ooreenkoms tussen die GKSA en die NG Kerk” aan die sinode voorgehou.
Die sinode het egter geoordeel dat die memorandum soos dit voorgehou is, nog verdere bespreking en verfyning nodig het en dat sinode 2012 nie die betrokke memorandum net so (sonder wysigings) kan goedkeur nie.
Die sinode het besluit om die memorandum terug te verwys na twee deputategroepe, naamlik Deputate Ekumenies Binnelands (wat skakel met kerke) in oorleg met Deputate Leerstellig (wat leerstellige sake hanteer).
Die tweede aanbeveling dat die Deputate Ekumenies Binnelands voort moet gaan met bilaterale gesprekvoering met die NG Kerk is goedgekeur.