- Artikelopsies
- Deel
- Kry Beeld op
G’n maatreëls om geldmors te keer
deur Sarel Myburgh van Montana
2012-02-05 21:39
In Beeld van 31 Januarie word berig hoe tien munisipaliteite van die Noordwes-provinsie R718 miljoen ongemagtig bestee het.
’n Mens kan net jou hande saamslaan en vra: Hoe lank gaan die belastingbetaler nog moet toekyk hoe geld wat tot voordeel van die armstes aangewend kon word, deur onbevoegde en onbekwame amptenare gemors gaan word?
Ongemagtigde besteding – lees ook korrupsie en diefstal – moes lankal as ’n kritieke prestasie-area hanteer en bestuur gewees het. Maar wat is daaraan gedoen?
Ons vorige minister van finansies is wêreldwyd geloof vir sy bekwame hantering van die ekonomie, maar op hierdie allerbelangrikste aspek val pap daagliks op die grond.
Watter maatreëls bestaan vandag om hierdie bodemlose put-situasie te voorkom? Niks!
Nou word een ná die ander provinsie (of sekere departemente) “onder administrasie” geplaas.
Wie gaan hierdie provinsies (departemente) reg bestuur? Met watter mense?
Stel bekwame amptenare op alle vlakke aan, agbare minister. Mense met kennis en ervaring asseblief.
En moenie na kleur kyk nie.
Bekwaamheid moet die wagwoord wees.