- Artikelopsies
- Deel
- Kry Beeld op
Hoekom jou oor die begin bekommer as die einde so naby is?
deur Loot Grossmann van Benoni skryf
2010-07-29 22:37
Met die evolusiedebat is daar weer iets aan die klok gehang wat nie daar hoort nie.
Aan mnr. Jean Oosthuizen van Kletskerk, wat die debat geïnisieer het, wil ek net sê: Moenie ’n geveg begin en dan weghardloop nie.
Jy het jou kop in ’n bynes gedruk sonder dat jy die kennis het om die gevolge te hanteer.
Mense kritiseer prof. Pieter Strauss omdat hy nie die vuurtjie verder wil aanblaas nie. Aan prof. Strauss wil ek net sê: Ek respekteer jou reaksie. Jy is duidelik kwaadwillig gekonfronteer omdat jy ’n gesiene figuur is. In jou reaksie het jy eerlik en opreg jou mening gegee deur te sê waarin jy as persoon glo en nie glo nie.
Ek kan nie uit die koerantberig aflei dat jy iemand probeer oortuig het om jou geloof met jou te deel nie.
Na my mening is dit sinneloos om te probeer vasstel hoe God nou eintlik die lont van die oerknal ontwerp en aangesteek het en hoe Hy iets laat uitsit het wat nooit bestaan het nie, terwyl ons nog nie eens weet of die hoender of die eier eerste was nie.
Trouens, vandag se probleme in die skepping en veral onder ons mense is so intens en ingewikkeld dat daar eintlik nie tyd is om op fossiele en die verlede te konsentreer nie, tensy dit ons ’n beter toekoms kan waarborg.
Ek wonder ook of dit nog sinvol is om God in die begin te gaan soek terwyl die einde soveel nader is.