- Artikelopsies
- Deel
- Kry Beeld op
Hoeveel Bybelblaaie sal oupa nou uitskeur?
deur Nadenker
2010-01-06 21:10
Ek het nooit my oupa aan vaderskant ontmoet nie. Soos ek verstaan, was hy so ’n bietjie van ’n kerkman op sy tyd gewees. My pa het my die volgende storie van hom vertel:
Hy het huisbesoek gedoen by ’n man om vir hom sy leviete voor te lees. Nadat my oupa ’n stukkie uit die Bybel gelees het, het die man gesê hy stem nie saam daarmee nie.
“Dis nie ’n probleem nie,” het my oupa gesê en hy het die spesifieke bladsy uit die man se Bybel geskeur.
Die man was geskok en woedend. “Jy het dit mos nie nodig nie,” het my oupa geantwoord.
Hy het glo nóg ’n paar bladsye uit die man se Bybel geskeur.
Dit is so ’n bietjie kras, maar steeds insiggewend.
’n Mens kan dink aan ’n paar bladsye wat belangrike dinge te sê het. Byvoorbeeld jy “moet jou vyande liefhê,” jy “moet die kwaad met die goeie vergeld,” in Christus is daar “nie Jood of Griek nie” (in ons konteks, “nie wit of swart nie”) en – in verdediging van Wilhelm Jordaan – “ons ken maar gedeeltelik”.
Ek wonder, as my oupa vandag by die Afrikaner moet huisbesoek doen, hoeveel van dié bladsye hy sal moet uitskeur.