- Artikelopsies
- Deel
- Kry Beeld op
Iets skort met private hospitale, fondse
deur Amper Uitgebuite Ouer van Die Wilgers
2012-02-05 21:39
Ons onlangse ondervinding met ’n private hospitaal en later ’n staatshospitaal het ons oortuig dat verskeie duur prosedures by private hospitale heeltemal onnodig gedoen word.
Ons seun het ’n kopwond opgedoen en is na ’n private hospitaal gebring omdat die indruk bestaan het dat hy ’n mediese fonds het.
Hyself het geheueverlies gehad en kon nie inligting verskaf nie.
By die private hospitaal is die wond toegewerk (vyf steke teen R1 800) en ons is gekontak om te hoor wie gaan aanspreeklikheid vir die rekening aanvaar.
Toe hulle hoor dat hy nie ’n mediese fonds het nie, het hulle ’n beraamde koste vir verdere behandeling gedoen.
Weens sy beserings moes hy, aldus die private hospitaal, in hoësorg opgeneem word en verskeie toetse sou gedoen moes word teen ’n beraamde aanvanklike koste van R50 000.
Bewus van die feit dat dit nie die finale bedrag gaan wees nie, het ons voorgestel dat hy na ’n staatshospitaal oorgeplaas word.
By die staatshospitaal het hy drie dae lank op ’n bed sonder enige behandeling gewag.
Die vierde dag is hy in ’n algemene saal opgeneem en die vyfde dag is hy ontslaan – sonder dat hy ’n sent hoef te betaal.
Iewers is iets nie pluis met die private hospitale en mediese fondse nie.
Private hospitale eis hoë bedrae en die lede van mediese fondse betaal vir die gelag met hoë premies.