- Artikelopsies
- Deel
- Kry Beeld op
Jonges is slagoffers van vaders se sonde
deur Slagoffer van Kaapstad
2012-02-01 22:50
Op die kampus van die Universiteit van Pretoria (UP) betoog ’n groepie intelligente wit jongmense omdat hulle ondanks uitstekende matriekuitslae nie gekeur is vir veeartsenykunde nie.
Swart studente wat moontlik laer punte gekry het, het glo voorkeur gekry.
Gesigte word swart gesmeer uit protes teen so ’n kennelike onreg.
Dit is ’n tragiese toneeltjie om te aanskou.
’n Mens wonder of dié opreg verontregte jongmense ooit die volle verhaal van die geskiedenis van Afrikaners ken.
Weet hierdie jongmense van ’n tyd – skaars 30 tot 60 jaar gelede – toe die toneel omgekeerd was?
’n Tyd toe geen enkele swart mens in die land die geringste kans gehad het om tot ’n “Afrikaanse” universiteit toegelaat te word nie, wat jou punte ook al was.
’n Tyd toe swart mense moes hoor dat dit geen sin het dat hulle matriek slaag nie, want wat sou hulle tog daarmee wou doen?
’n Tyd toe daar uit die hoogste raadsale van Suid-Afrika met swaarwigtige oortuiging verkondig is dat swart mense net bestem is om “sekere soorte hande-arbeid” te verrig.
Die toneel by die UP is ’n tragedie. Tog is dit die gevolg van ’n vasberadenheid om, te midde van beperkte geriewe en bronne, reg te stel wat in daardie vervloë jare so skrikwekkend verkeerd was.
Dit is waar dat die groepie jongmense met die besmeerde gesigte dit nie verdien nie.
Hulle is die slagoffers van die waansin van hul ouers en grootouers se geslagte.
Dáárdie ouer geslag het sleg geluister toe daar elke Sondag in die kerk gelees is uit Eksodus 20: “Die sondes van die vaders word besoek aan die kinders, selfs tot in die derde geslag van dié wat My haat ...” (Ou vertaling van Eksodus 20:5).
Dade van onreg het gevolge, dikwels juis vir hulle wat dit glad nie verdien nie.