- Artikelopsies
- Deel
- Kry Beeld op
Mulder, Motlanthe werk agter skerms
deur Olivier Henning van Villiersdorp skryf:
2012-02-22 22:02
Die minister van binnelandse sake het aangekondig dat die Voortrekkermonument eersdaags tot nasionale erfenisterrein verklaar gaan word.
Dit word blykbaar gedoen in belang van nasionale versoening. ’n Mens wonder onwillekeurig hoekom pres. Jacob Zuma dit nie in sy staatsrede, wat juis oor nasionale versoening gehandel het, aangekondig het nie.
Dr. Pieter Mulder, adjunkminister van landbou, het adj.pres. Kgalema Motlanthe in Oktober verlede jaar op ’n besoek aan die Voortrekkermonument geneem om hom te wys waarom die monument werklik ’n nasionale erfenisterrein behoort te wees.
Die adjunkpresident het onderneem om aandag aan die saak te gee. Dit lyk dus of die regering se nuwe standpunt uit dié besoek voortspruit.
’n Tweede saak waaroor albei hierdie leiers die regering se amptelike standpunt verander het, was die Ebo-projek van die Erfenisstigting.
Dit het behels die terugbring van die oorskot van vier Suid-Afrikaanse soldate wat in die 1980’s in Angola dood is.
Ondanks die samewerking van die Angolese regering wou die Suid-Afrikaanse regering oor baie jare nie goedkeuring verleen nie.
Eers nadat Mulder die aangeleentheid met Mo- tlanthe bespreek en hy opdrag aan die betrokke staatsdepartemente gegee het, is goedkeuring gegee.
Albei dié leiers werk agter die skerms vir nasionale versoening sonder dat hulle in die kollig kom.