- Artikelopsies
- Deel
- Kry Beeld op
Ná rokers se slegte gedrag groet ek Loftus
deur Pieter van Pretoria skryf
2010-07-29 22:37
Ek het baie lank gewag vir die dag dat ek my dogters (7 en 11) Loftus toe gaan vat om rugby te gaan kyk.
Aangesien mense nie meer daar mag rook nie, was ek oortuig daarvan dat die tyd daarvoor ryp was. Ek het vas geglo dat my kinders dit sou geniet.
Groot was my teleurstelling egter toe ons by ons besoek met rokers te doen gekry het wat reg agter ons gesit het. Dit het my baie geïrriteer – veral aangesien daar oor en oor gesê is dat dit ’n rookvrye stadion is.
Dít was egter nie wat my die meeste afgeskrik het nie. Toe ek die rokers versoek om nie te rook nie, was die gort gaar.
Ek is voor my kinders gevloek, geskel en uitgekryt: Wie is ek wat dit waag om hulle daaraan te herinner dat hulle nie mag rook nie? Hoe selfsugtig!
Dit het my onmiddellik onveilig en bowenal weerloos laat voel omdat my dogters, wat nie sulke gedrag ken of kan verwerk nie, by my was.
Ek groet Loftus. Van nou af kyk ek rugby op TV. Loftus bly ’n plek waar ondersteuners hulle swak gedra. Daarmee wil ek nie geassosieer word nie.