- Artikelopsies
- Deel
- Kry Beeld op
Net nog ’n Malema van ’n ander velkleur
deur Hein Gehle skryf per e-pos
2010-03-12 22:21
Monte Lubbe se verstommende optrede soos in sy brief “Solidariteit mors ook maar net ons geld” van 10 Maart uiteengesit, kan nie onaangeraak gelaat word nie.
Die man is net nog ’n Malema met ’n ander velkleur en ander agenda.
Dink hy hy is ’n held om 300 000 negatiewe e-posse oor sy land die wêreld in te stuur?
(Dit is natuurlik as ons aanvaar dat hy weet waar om die rekenaar aan te skakel en nie sommer bog praat nie).
Dit kan die land, die ontwikkeling en werkgeleenthede onherroeplike skade aandoen.
Het hy nie die vermoë om te onderskei tussen sy land en die regering van die dag nie?
Ons is almal gefrustreerd met die onbeholpe wyse (ondanks sommige uitstekende beleidsrigtings) waarop die ANC-regering en sy instrumente die land bestuur.
Veral die misnoeë waarmee hulle die konstitusionele bestel benader, wek groot kommer.
Gegewe die huidige politieke balans, het liewe Monte nog nie wakker geword tot die feit dat ’n demokrasie dit verg dat gewone burgers en die burgerlike instellings ’n kritieke rol het tussen verkiesingsdatums om die Grondwet te beskerm en in werkende orde te hou nie?
Hoewel ek inherent anti-vakbond is, kan ek die rol wat Solidariteit en ander burgerlike instellings tans speel en die verantwoordelikheid wat hulle namens ons almal op hulle neem om die konstitusie te bewaar, bloot toejuig.
Monte met sy benadering en denke gaan niks vermag anders as om die baba met die badwater uit te gooi nie.
Dit sou beter wees as hy en ander kluite wat soos hy dink eerder die land verlaat as om hier te sit en die land soos ’n stadige kanker skade aan te doen met sy negatiewe denke en optredes.
Miskien sal die kollektiewe denkvermoë van diegene wat agterbly dan aansienlik styg.