- Artikelopsies
- Deel
- Kry Beeld op
Nie ek of my kinders is hulpelose ‘prawns’
deur Nadenker
2009-12-17 07:00
Ek verwys na die oulike wetenskapfiksiefliek District 9. Ruimtewesens met ’n yslike groot ruimtetuig kom parkeer bo Johannesburg.
Hulle is hulpeloos, verwaarloos en wil eintlik maar net huis toe gaan, maar kan nie.
Op die ou end word meer as ’n miljoen van hulle in ’n ghetto in ’n swart woonbuurt van Soweto geplaas.
Hier teer hulle op ashope en is verslaaf aan katkos. In die algemeen lei hulle ’n afgesonderde lewe, omring deur swart mense en die mensdom wat niks met hulle te doen wil hê nie.
Hulle word deur mense “prawns” genoem, gegrond op hul voorkoms.
Afrikaners (die meeste?) bevind hulself in ’n psigologiese ghetto.
Hulle voel vervreemd en miskien hulpeloos, omring deur mense waarvan hulle wil vlug.
“Ons het ’n sterk leier nodig.”
Ja, maar waarheen gaan hy ons lei?
Hulle teer op die ashope van kwaal-afval. Is verslaaf aan die katkos van misdaad, korrupsie en diskriminasie.
Daar is tog so baie daarvan en hoe lekker eet hulle nie!
Dit breek my hart om te sien hoe my mede-Afrikaners, die mense wat oor so baie potensiaal beskik, wat so baie kan vermag, wat so ’n uitsonderlike bydrae kan lewer tot ons samelewing, wat sulke groot harte kan hê, krepeer onder die juk van ’n slagoffer-sindroom.
Ja, my hart gaan uit aan almal wat die slagoffers van geweld was en julle pyn en verlies wil ek nie vir een oomblik van die tafel vee nie!
Ja, alles wat verkeerd is, moet aan die kaak gestel word!
Maar dit is een ding om van hierdie dinge bewus te wees (nog beter om daaroor iets te doen), een ding om ’n slagoffer te wees, maar dit word ’n baie slegte ding om daarop te teer.
Daar is tog ’n wysheid wat spreek: die lewe is 10% wat met jou gebeur, 90% hoe jy daarteenoor reageer.
Die verskil tussen die “prawns” van District 9 en Afrikaners is die laasgenoemde het ’n keuse.
Die Vader weet, ons land staan klaar gebuk onder ’n slagoffer(struggle)-sindroom.
Moet ons, en ons kinders, ook in hierdie psigologiese strik vasgevang word?
Ek het klaar ’n keuse gemaak. Ek, of my kinders, is nie “prawns” nie.