- Artikelopsies
- Deel
- Kry Beeld op
Pasop vir sogenaamde ‘conservation fee’
deur Estelle Smith skryf per e-pos
2010-03-09 22:35
Op 6 Maart 2010 het ons gesin Krugerwildtuin toe gery om te gaan dagbesoek. Ons het ons tente saamgevat en het gehoop dat ons oornag kampeerplek sou kry.
By Malelane aangekom het my man R160 ingang betaal. By Berg-en-Dal se kantoor het my man die brosjure met die kwitansie van die Malelane-hek aan ’n vrou oorhandig en gevra of hulle ’n kampeerstaanplek vir ons het.
Haar kollega sê aan haar sy moet onthou van die “conservation fee”.
Sy kwoteer ons toe R821 vir een nag tentstaanplek en toe my man navraag doen oor die hoë bedrag sê sy dis oor die “conservation fee”.
Ons pleegkind het nog nooit gekamp nie en het vreeslik uitgesien na die ondervinding, daarom het my man die geld oorbetaal.
Die kwitansie wat sy bo-oor die Malelane-hek-kwitansie geheg het wys net “PAID R821,00” en dit wys nie hoe sy by daardie bedrag uitgekom het nie.
Terug by ons voertuig het my man my gewys wat die nag in ons eie tent ons gaan kos en ek is onmiddellik terug kantoor toe om die transaksie te kanselleer.
Ná vele verskonings soos die vrou is in opleiding, sy het nie gesien ons het reeds by die Malelane-hek vir die ingang betaal nie; en ons is “per ongeluk” vir twee nagte bespreek.
Hulle vra ons toe R246 vir die nag vir ’n tentstaanplek.
Ek het tot die gevolgtrekking gekom dat die eerste vrou gesien het my man het ’n hele paar R100-note in sy beursie gehad.
Sy gee toe aan die tweede vrou die kodewoord deur te sê sy moet onthou van die “conservation fee”. Dit beteken “rip him off”.
Toe ek die transaksie kom kanselleer, het die een wat eerste gesê het van die “conservation fee” gemaak of dit die ander een was wat ’n “fout” begaan het.
As niemand kla nie, deel die personeel die geld.
Hoeveel gaan gesteel word by die 2010-sokkertoeriste?
Is dit die personeel wat hulself ’n bietjie verryk of is dit dalk die Krugerwildtuin se eie veldtog om meer geld te verdien uit besoekers?