- Artikelopsies
- Deel
- Kry Beeld op
Rian, my seun is beslis nie breindood
deur Hardus Pretorius van Centurion skryf:
2012-02-10 22:03
Ek verwys na Rian van Heerden se ekskuus aan die Nuwe Hoop-skool in Beeld van 9 Februarie onder die opskrif “Rian sê ekskuus vir Nuwe Hoop”.
Rian, jou verskoning aan Nuwe Hoop het geen waarde nie nadat jy op 8 Februarie net ná 06:00 op die lug gesê het jy moet ’n “verskoninkie” maak. Dit wys vir my en ek glo vir talle ander luisteraars dat jou verskoning nie eg is nie.
Ashley Hayden se aanmerking “You must use small words” wys ook dat tussen julle twee het julle geen respek vir Nuwe Hoop en ander mense nie.
Ek hoop van harte dat mnr. Dawie Harmse gaan volstaan met die klagte teen jou.
Rian, my seun is ook in Nuwe Hoop en ek kan jou verseker dat hy nie breindood is nie.
Hy weet om nie aanmerkings te maak wat ander mense seermaak nie.
Ek sou graag wou weet by watter instelling Rian geleer het om sy brein beter aan te wend, want duidelik wend hy dit nie reg aan nie met sy gereelde aanmerkings teenoor mense en luisteraars.
Daar bestaan nie so iets soos breindooie mense nie. Almal is geskape met sy eie geaardheid. Jou onvoorwaardelike “verskoninkie” word glad nie deur my aanvaar nie.
Ek glo ek praat namens die meeste luisteraars van Jacaranda 94.2 dat Rian in die pad gesteek moet word.
Dan eers sal ons weet dat die radio- stasie opreg spyt is oor Rian se aanmerking.