Ek weet nie of dit arrogansie of naïwiteit is nie, maar die vorige
Bok-breier het nie ’n idéé wat gebeur in die harde wêreld van professionele
sport nie. Wat praat hy van uittredingstrategie?
Saru skuld hom niks. Hy het ’n kontrak met hulle gehad wat sou
verval. Indien hulle reeds in Julie verlede jaar met werwing begin het, is dit
nie so snaaks nie. Óf hulle het hom nie as ’n kandidaat vir ’n tweede termyn
beskou nie óf hulle wou kyk wat die mark bied. Dit is hul goeie reg.
Wat John Smit en Victor Matfield betref: Van wanneer af het jy ’n
uittredingstrategie vir spelers? Jy het ’n opvolgplan as afrigter.
John Smit se
opvolger is bekend, so ook dié van Victor.
De Villiers vergeet dat 1995 se kaptein daarna die trekpas gekry
het en so ook sy opvolger (Gary Teichmann) in 1999, voor die Wêreldbeker. Hulle
was albei groot spelers wat verdien het om nog vir die Bokke te speel.
De Villiers maak hierdie stellings sonder om te motiveer wat hy
bedoel met uittredingstrategie. Dis hoe hy in sy termyn as afrigter te werk
gegaan het en dan moet almal oor sy woordkeuses wonder.
Hoe gouer Beeld hom ignoreer, hoe beter vir almal.