- Artikelopsies
- Deel
- Kry Beeld op
Skande dat behulpsames moet opdok
deur Motoris van Wonderboom skryf:
2012-02-06 22:07
Die Beeld-brief “Karwagte betaal om te kan oppas” (6 Februarie) het betrekking.
Ek het begrip vir motorwagte se situasie. Maar magtig, meeste van hulle ignoreer my wanneer ek by my motor aankom met ’n trollie, skreeuende kind, selfoon wat lui, handsak oor die skouer wat trek na my enkel toe en met my sleutel tussen die tande.
Hulle verroer ook nie ’n vinger nie as ek sukkel om die motor oop te kry, my kind in die motor te gooi, al die pakkies self kattebak toe te dra, die weghol-trollie met my toon te vang en daarmee terug te hardloop voordat die polisie my vastrek weens kindermishandeling.
Nadat ek alleen deur dit alles is, het die motorwag gewoonlik die vermetelheid om vir my te wil wys hoe om my motor uit die parkeerplek te trek.
Maar aan dié wat dadelik die trollie oorneem, baie dankie! Dit is ’n skande dat julle moet betaal.